Úkimet «Pedagog mártebesi týraly» zań jobasyn bekitti
NUR-SULTAN. QazAqparat - Búgin Úkimet otyrysynda «Pedagog mártebesi týraly» zań jobasy bekitildi, dep habarlaıdy QazAqparat tilshisi.
«Pedagog mártebesi týraly» zań jobasy Elbasynyń tapsyrmasy boıynsha ázirlendi. Jobany ázirleýdiń negizgi ıdeıasy - muǵalimderdiń júktemesin azaıtý, olardy ózderine tán emes jumystardy oryndaýdan bosatý arqyly ózin ózi damytýǵa jáne shyǵarmashylyqqa múmkindik berý. Sondaı-aq kásibı turǵydan damýǵa jáne ustazdardyń básekege qabilettiligin arttyrýǵa jaǵdaı jasaý josparlanǵan. Sonymen qatar pedagog mártebesin arttyrý, olardy yntalandyrý mindeti kózdeledi. Bilim jáne ǵylym mınıstrligi usynǵan jańa zań jobasy jalpy osy mindetterge saı keledi«, - dedi Úkimet basshysy Asqar Mamın.
Premer-Mınıstrdiń aıtýynsha, muǵalimderdiń jalaqysyn arttyrýǵa, eńbek demalysyn 56 kúnge deıin ulǵaıtýǵa, pedagogıkalyq sheberlik, tálimgerlik úshin qosymsha aqy tóleýge baǵyttalǵan sharalar kózdeledi.
»Jalpy, zań jobasyn iske asyrý muǵalim mamandyǵynyń mártebesin arttyrýǵa pedagogter úshin áleýmettik kepildik júıesin jasaýǵa múmkindik beredi. Pedagog mártebesi týraly« zań jobasyn ázirleý basqa da zańnamalyq aktilerge túzetýler engizýdi qajet etedi», - degen Asqar Mamın negizgi jáne ilespe zań jobalaryn daýys berýge shyǵaryp, ony áriptesteri biraýyzdan qoldady.
Osydan keıin Úkimet basshysy Bilim jáne ǵylym mınıstrligine zań jobasyn Parlament Májilisine 1 qyrkúıekke deıin engizýdi tapsyrdy.
«Keıin zań jobasyn Parlamentte talqylaý kezinde mınıstr depýtattarmen tyǵyz jumys isteýi jáne pedagogter qaýymdastyǵyn habardar etýi qajet. Sonymen qatar ákimderdiń nazaryna, oqý jylynyń bastalýyna birneshe kún ǵana qaldy, mektepterdiń daıyndyǵyn baqylańyzdar», - dedi ol.
