Úkimet otyrysynda kóktemgi sý tasqynyna daıyndyq máselesi qaralady
ASTANA. QazAqparat - Primeminister.kz saıty QR Premer-Mınıstri Baqytjan Saǵyntaevtyń qatysýymen ótetin oqıǵalar ańdatpasyn jarııalady.
«20-25 aqpanda QR Premer-Mınıstri Baqytjan Saǵyntaevtyń tóraǵalyǵymen QR Úkimeti otyrysy ótedi. Aldaǵy kóktem maýsymy qarsańynda otyrysta ortalyq jáne jergilikti atqarýshy organdardyń sý tasqyny kezeńine daıyndyǵy máselesi qaralady», - delingen habarlamada.
QR Prezıdenti Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýynda aıtylǵan bilim berý júıesin reformalaý aıasynda elektrondy oqytý júıesin engizý jáne densaýlyq saqtaý men jumyspen qamtý salasyndaǵy birqatar normatıvtik-quqyqtyq qujattardy qaraý josparlanǵan.
Budan ózge, QR Premer-Mınıstri Baqytjan Saǵyntaev Qazaqstannyń 30 damyǵan eldiń qataryna qosylýy boıynsha jumys aıasynda EYDU-men ózara is-qımyl jónindegi keńes otyrysyn ótkizedi.
Qazaqstanda balamaly energııa kózderi men jasyl ekonomıkany damytý boıynsha jumys aıasynda Astanada Halyqaralyq EKSPO-2017 mamandandyrylǵan kórmesin ótkizýge daıyndyq barysy týraly keńes ótedi.
Aldaǵy aptada Premer-Mınıstr Baqytjan Saǵyntaevtyń birqatar halyqaralyq kezdesýleri josparlanǵan. RF Úkimeti Tóraǵasynyń Birinshi orynbasary Igor Shývalovpen jáne QHR-nyń QR-daǵy Elshisi Chjan Hanhýeımen ekijaqty ekonomıkalyq qatynastardaǵy aǵymdaǵy jaǵdaıdy jáne ortaq jobalardy iske asyrý barysyn talqylaý josparlanǵan.
Sondaı-aq, qaptalmaǵan júkterdiń barlyq assortımentine arnalǵan elektrondy saýda alańy bolyp tabylatyn «Jumore» kompanııasynyń Prezıdenti Lý Hýnsıanmen Qazaqstanda jańa ındýstrııalar qurýdy talqylaý josparlanǵan jáne EQDB Basqarýshy dırektory Tomas Maıermen Qazaqstan aýmaǵyndaǵy birqatar iri jobalardy iske asyrýdy jáne basqa da ózekti máselelerdi talqylaý josparlanǵan kezdesýler ótedi.
QR Premer-Mınıstriniń birinshi orynbasary A. Mamınmen AEA qyzmet túrlerin keńeıtý jáne olardyń ınfraqurylymyn damytý máseleleri jóninde selektorlyq keńes, sondaı-aq Astanada birqatar halyqaralyq is-sharalar ótkizý máseleleri jóninde keńes ótkizý josparlanǵan.
Budan ózge, A. Mamın EKSPO kórmesiniń halyqaralyq qatysýshylarynyń jınalysyna qatysady, sondaı-aq Tashkentke jáne Almaty oblysyna jumys saparlary josparlanǵan.
QR Premer-Mınıstriniń orynbasary - QR aýyl sharýashylyǵy mınıstri Asqar Myrzahmetov birqatar keńester ótkizedi, olardyń arasynda jumys toptarynyń kooperatsııa baǵdarlamasyn túsindirý boıynsha óńirlerge saparlarynyń qorytyndysy, aýyl sharýashylyǵyndaǵy saqtandyrýdy jetildirý jáne agroholdıngterdiń túıitkildi máselelerin sheshý boıynsha keńester josparlanǵan.
Sondaı-aq, A. Myrzahmetov GFR Tótenshe jáne Ókiletti elshisi R. Mafaelmen kezdesý ótkizedi.
