Úkimet otyrysynda qazaqstandyq fermer kombaındarǵa qatysty óz pikirin bildirdi
ASTANA. QazAqparat - Búgin Úkimet otyrysyna qatysqan Qaraǵandy oblysy fermerleri odaǵynyń tóraǵasy Igor Jabıak aýyl sharýashylyǵynda kórshiles elderdiń kombaınynan góri úzdik sheteldik tehnıkany alýdy usyndy, dep habarlaıdy QazAqparat.
Aıta keteıik, otyrys barysynda I. Jebıak saladaǵy atqarylyp jatqan sharalar boıynsha baıandama jasaǵan bolatyn. Keıin baıandamasyn toqtatyp, alańdatyp júrgen máselerin jaıyp saldy.
«Biz fermelermen aýyl sharýashylyǵy tehnıkasy boıynsha kóp pikir almasyp kelemiz, olardyń arasynda Reseıdiń, Belarýs, Polsha jáne Germanııadaǵy dıqandardyń da pikirin bildik. Nege Reseı men Belarýstiń fermerleri «John Deere» , «Claas» kompanııalarynyń egin otyrǵyzatyn keshenderin nemese egin oratyn kombaındaryn padalanady? Nege biz reseılik kombaındarǵa aýysýymyz kerek? Osy oraıda reseılik kombaındardy atalǵan kompanııalardyń tehnıkasymen salystyrýǵa kelmeıtini anyq. Atap aıtqanda, búginde úlken egis alqaptaryn tıimdi túrde ıgerip, egin oraǵy naýqanyn shyǵynsyz ótkizýdi maqsat etemiz. Máselen, «John Deere» kombaıny 5-6 «Enıseı» nemese «Don» kombaındaryn almastyra alady. Sondyqtan búginde tehnıkamen qamtamasyz etý sharalarynda aldaǵy josparlardy pysyqtap shyqqanymyz abzal», - dep oıyn bildirdi Igor Jebıak.
Óz kezeginde QR Úkimet basshysy Baqytjan Saǵyntaev Qaraǵandy oblysy fermerleri odaǵynyń tóraǵasy aldyn ala daıyndalǵan baıandamasyna qaraǵanda, óz oıymen problemalardy jetik jetkizgenin atap ótti. «Siz qaǵazsyz barlyǵyn jaqsy ári durys aıtyp berdińiz. Eger qaǵazǵa aldyn ala jazylǵandy oqysańyz, olaı bolmas edi»,-dep atap ótti B. Saǵyntaev.
Aıta keteıik , QR Aýyl sharýashylyǵy mınıstrligi agroónerkásiptik keshendegi problemalardy sheshý kartalaryn ázirledi.
Olardyń arasynda agroónerkásiptik keshendi qarqyndy tehnıkalyq qaıta jaraqtandyrý kartasy da qamtylǵan.
Aýyl sharýashylyǵy birinshi vıtse-mınıstri Qaırat Aıtýǵanovtyń aıtýynsha, AÓK-ti qarqyndy tehnıkalyq qaıta jaraqtandyrý Kartasy aıasynda túpkilikti mólsherlemesi 5%-ǵa deıin otandyq aýyl sharýashylyǵy óndirisine jeńildetilgen nesıe berý baǵdarlamasyn engizý kózdelip otyr. Sonymen qatar aýyl sharýashylyǵy tehnıkalaryn qarqyndy qaıta jaraqtandyrý maqsatynda otandyq tehnıkalardy satyp alý úshin ınvestıtsııalyq sýbsıdııalar mehanızmin ózgertý eskerilgen, bul rette ol satyp alýshyǵa emes, zaýytqa tólenedi. Al óz kezeginde zaýyt sýbsıdııa somasynda tehnıkany satyp alýǵa jeńildik beredi. «Jalpy, 2021 jylǵa deıin jeńildikti nesıeleýge 217 mlrd teńge qajet bolady. Qarjynyń qaıtarymdylyǵy esebinen aýyl sharýashylyǵy tehnıkasy parkin jańartýdyń ońtaıly deńgeıin qamtamasyz etpekpiz», - dedi ol.
«Tozyǵy jetken tehnıkany paıdalaný men janar-jaǵarmaıǵa jumsalatyn shyǵyndardyń shamamen 20 paıyzǵa artýyna jáne eń bastysy, jalpy jınalymnyń shamamen 14 paıyzyn nemese shamamen 200 mlrd teńgeni joǵaltýǵa ákelip soqtyrady. Atap aıtqanda, aýyl sharýashylyǵy tehnıkasy boıynsha 20 otandyq óndirýshi 30 paıyzdan joǵary emes deńgeıde júktelgen, al ımport kólemi óndiris kórsetkishinen eki eseden astam artyqtaý. Eger de úlken kombaındar men traktorlardyń ımportyn almastyrýǵa ýaqyt qajet bolsa, onda qazirgi merzimde «shaǵyn mehanızatsııa», ıaǵnı topyraq óńdeıtin ári jem-shóp daıyndaıtyn tehnıka boıynsha jaǵdaıdy ózgertýge qaýqarlymyz. Tek osylar boıynsha ımport jylyna 60 mln AQSh dollaryn qurap otyr», - dedi vıtse-mınıstr.
