Úkimet otyrysynda Qaraǵandy oblysynyń ákimi Shahan kentinde apatqa ushyraǵan úı jaıynda esep berdi
ASTANA. QazAqparat - Búgin Úkimettiń selektorlyq rejimdegi otyrysynda Qaraǵandy oblysynyń ákimi Nurmuhambet Ábdibekov Shahan kentinde apatqa ushyraǵan kóppáteri turǵyn úı jaıynda esep berdi, dep habarlaıdy QazAqparat.
«Mamandandyrylǵan uıym bul úıdiń úsh podezi odan ary paıdalanýǵa jaramdy degen qorytyndy shyǵardy. Qıraǵan tórtinshi podezdiń sol jaq qanatynyń tehnıkalyq jaı-kúıi «shekteýli jumysqa qabiletti» dep, al oń jaq qanaty apatty jáne buzylýǵa jatady dep baǵalandy. Qırandylardy tazalaý aıaqtaldy. Tórtinshi podezdiń ilinip turǵan qurylǵylaryn buzý jumystary júrgizilýde. Búgin biz birinshi qabatyn aıaqtaımyz, tek jertólesi ǵana qalady. Osydan keıin atalǵan podezdi nyǵaıtý úshin qurylys jumystaryna kóshemiz. Bul podezdiń 13 páterinen 4 páterdiń ıesine baspana beriletin bolady. Jóndelip, qaıta qalpyna keltirilgen qalǵan páterlerge turǵyndar kóship barady», - dedi ákim.
Onyń aıtýynsha, úıden tysqary qazandyq ornatylyp, 7 qańtar kúni jylý berilgen. Úsh podezdiń turǵyndary óz páterlerine oralǵan.
«Ókinishke oraı 9 adam qaza tapty. 4-6 qańtarda biz qaza tapqan azamattardy jerleýmen baılanysty barlyq sharalardy atqardyq. Eki adam túrli jaraqatpen travmatologııa klınıkasynda jatyr. Jaǵdaılary turaqty, ońalý belgileri baıqalady», - dedi Ábdibekov.
Onyń sózine qaraǵanda, 4 qańtarda apat saldarynan zardap shekkenderge kómek kórsetýge arnalǵan jeke qaıyrymdylyq qory ashyldy. Túsken qarajat zardap shekkenderge materıaldyq kómek kórsetý úshin beriletin bolady. Búgingi kúni qaza tapqandardyń otbasylaryna jáne zardap shekkenderge 9 mln. teńge kóleminde materıaldyq kómek kórsetildi.
«Tótenshe jaǵdaıdyń sebebin anyqtaý úshin tergeý komısııasy quryldy. Іshki ister departamenti qylmystyq is qozǵap, sáıkesinshe tergeý amaldary júrgizilýde. Joǵaryda atalǵan sharalardyń barlyǵy da Shahan kentindegi tótenshe jaǵdaıdy joıý jónindegi oblys bekitken jospar aıasynda júrgizilip jatyr», - dedi ol.
