Úkimet otyrysynda elimizdegi mádenıet obektilerin damytý máseleleri talqylandy
ASTANA. QazAqparat - Premer-mınıstr Baqytjan Saǵyntaevtyń tóraǵalyǵymen ótken kezekti Úkimet otyrysynda elimizdegi mádenıet obektilerin damytý men jańǵyrtý máseleleri qaraldy. Sonymen qatar, Qazaqstannyń din salasyndaǵy memlekettik saıasatynyń tujyrymdamasy talqylandy.
Búgingi tańda elimizde 7853 mádenıet uıymy bar eken. Onyń ishinde - 64 teatr, 4118 kitaphana, 238 mýzeı, 39 kontsert uıymy, 94 kınoteatr, 3 296 mádenı uıym men oıyn-saýyq saıabaǵy, 4 tsırk bolsa, 38 uıym respýblıkalyq mańyzy bar mártebege ıe. Mádenıet jáne sport mınıstri Arystanbek Muhamedıuly respýblıkalyq mádenıet mekemeleriniń qyzmetin júıelendirý boıynsha júrgizilgen jumystar týraly baıandady.
Qazirde memlekettik mádenı mekemelerdiń eń tómengi memlekettik normatıvteri men tıptik shtattary bekitilgen. Mádenıet týraly zańǵa túzetýlerge sáıkes, mádenıet uıymdaryn qurý, taratý men qaıta qurý máseleleri tek mınıstrliktiń kelisimi arqyly sheshiledi. Qoǵamdyq mańyzy bar ádebıetterdi satyp alý tártibin retteıtin norma ázirlenýde, mundaı ádebıetter Úkimet janyndaǵy vedomstvoaralyq komıssııa deńgeıinde, qalamaqy tóleýdi eskerýmen júzege asyrylady. Sonymen qatar, 2020 jylǵa deıin týrıstik salany damytýdyń jańa tujyrymdamasynyń jobasy ázirlenýde. Jobany iske asyrý óz kezeginde, ártúrli shesh memleketterden elimizde keletin týrıster sanyn arttyryp, atalǵan saladaǵy kemshilikterdi joıýǵa múmkindik beredi.
Tarıhı jáne mádenı muralardy saqtaý, sondaı-aq, ishki jáne syrtqy týrızmdi damytý máselelerine toqtala kele, mınıstr barlyq respýblıkalyq mýzeıler men qoryq mýzeıleri respýblıkalyq memlekettik mekeme mártebesinen memlekettik qazynalyq kásiporynǵa aýysqanyn eske saldy. Bul olarǵa aqyly qyzmetter kórsetýge, sonyń esebinen jeke ǵylymı-ádistemelik bazalaryn damytýǵa múmkindik berdi. Mádenıet pen óner salasyndaǵy bilim berý mekemelerin mınıstrliktiń basqarýyna berýdiń nátıjesinde búginde shyǵarmashylyq kadrlardy úzdiksiz dýaldi oqytý qamtamasyz etilgen.
Bilim salasyndaǵy mádenıet nysandaryn damytý jáne jańǵyrtý máseleleri týraly bilim jáne ǵylym mınıstri Erlan Saǵadıev baıandady. Onyń aıtýynsha, mýzeılerge jumys isteýge keletin jáne olardyń jumysyna jańa serpin beretin bilim alýshylar sany artqan. 2016-2017 oqý jylynda óner mamandyqtary boıynsha bilim alýshylar kontıngenti 19 myńnan asady. Al ótken jyly nebári 2,5 myń adam bitirip shyqqan. Óner jáne mádenıet mamandyqtary boıynsha kolledjder men tehnıkýmdarda 13 myńǵa jýyq adam bilim alýda.
Baıandamalardy tyńdaı kele, Premer-mınıstr Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasynda belgilengen mindetter turǵysynan mádenıet salasyn damytý jáne halyqqa mádenıet nysandarynyń qoljetimdiligin arttyrý boıynsha aldaǵy sharalardy ázirleý qajettigin atap ótti.
Baqytjan Saǵyntaev Astananyń qoǵamdyq oryndarynda mádenıet uıymdarynda ótip jatqan barlyq oqıǵalar týraly azamattardy qulaqtandyratyn aqparattyq baǵandar ornatý bastamasyn qoldap, osyndaı jumysty elimizdiń barlyq óńirlerinde júrgizý qajettigin aıtty. Qazaqstandyqtar elimizdiń mádenı jáne tarıhı eskertkishterin tegin aralaý múmkindigine ıe bolýy qajet. Osylaı degen Úkimet basshysy Mádenıet jáne sport mınıstrligine óńirlerdiń ákimdikterimen birge elimiz boıynsha tanymdyq jáne etnografııalyq saıahattardy tegin uıymdastyrý úshin jaǵdaı jasaýdy tapsyrdy.
