Úkimet otyrysynda «Astana - túrki áleminiń mádenı elordasy» jáne «Astana - Dostastyqtyń mádenı elordasy» atty is-sharalardy ótkizýdiń barysy talqylandy
ASTANA. 19 maýsym. QazAqparat - Búgin Úkimet otyrysynda elimizdiń mádenıet jáne aqparat mınıstri Darhan Myńbaı «Astana - túrki áleminiń mádenı elordasy» jáne «Astana - Dostastyqtyń mádenı elordasy» atty is-sharalardy ótkizýdiń barysy týraly baıan etti, dep habarlady pm.kz saıty.
TÚRKSOI-ǵa múshe 14 eldiń ishinde Astana eń birinshi bolyp mádenı elorda mártebesin ıelendi jáne 2012 jyly Astana jyly dep jarııalandy. Aǵymdaǵy jyldyń 24 aqpanynda elordada, Beıbitshilik jáne kelisim saraıynda osy is-sharanyń saltanatty ashylý rásimi boldy.
Mádenıet mınıstri habarlaǵandaı, Astana qalasynyń ákimdigi men mınıstrlik birlese otyryp «Astana - túrki áleminiń mádenı elordasy» jylyn ótkizý jóninde naqty jospar ázirledi. Jospar boıynsha túrki tildes eldermen túrli formattaǵy birqatar sharalar josparlanǵan.
«Astana - túrki áleminiń mádenı elordasy» jylynyń aıasynda «Jańa myńjyldyqtyń jańa astanasy» atty fotosýretshilerdiń halyqaralyq kezdesýi, músinshilerdiń 5-shi kezdesýi, Qazaqstandaǵy Ázirbaıjannyń mádenıet kúnderi (maýsym aıynda), folklorlyq bı toptarynyń festıvali, «Astana tóńiregindegi myńjyldyq» atty kóshpeli órkenıetter festıvali jáne taǵy da basqa sharalar ótedi dep josparlanyp otyr.
Oǵan qosa, aǵymdaǵy jyly Astana «Dostastyqtyń mádenı elordasy» dep tanylyp otyr. Esterińizge sala keteıik, 2011 jyly 20 jeltoqsanda Máskeýde ótken TMD elderi Memleket basshylarynyń beıresmı sammıtinde «Dostastyqtyń mádenı elordasy -2012» ilki jobasyn Astanada iske asyrý týraly sheshim qabyldanǵan bolatyn.
2011 jyly Gomel (Belarýs) men Ýlıanovsk (Reseı) qalalary Táýelsiz memleketter dostastyǵynyń mádenı elordalary bolǵan edi. 2012 jyly Astana men Mary (Túrikmenstan) qalalary - Dostastyqtyń mádenı elordalary atanyp otyr.
Mádenıet jáne aqparat mınıstrligi Astana ákimdigimen birlesip uıymdastyrý komıtetin qurdy. «Jańa álemdegi eýrazııalyq mádenıet» atty halyqaralyq forýmdy uıymdastyrý jumystary júrgizildi jáne aǵymdaǵy jyly 15 maýsymda Astanada osynaý forým ótkizildi.
Jyl boıyna TMD elderi zamanaýı kompozıtorlarynyń kameralyq mýzyka festıvalin, TMD elderi etnografııalyq fılmderiniń «Samuryq-Etno-Fest» kınofestıvalin, Delfıı oıyndaryn, jetekshi teatrlar men óner ujymdarynyń gastroldik kontsertterin, t.b. is-sharalardy ótkizý josparlanyp otyr.
Jáne tájirıbe almasýdy qamtamasyz etý maqsatynda Astanada TMD elderi kitaphanashylarynyń forýmy men semınar-praktıkýmdar ótkiziledi.
