Úkimet otyrysynda 50 jastan asqan azamattardy jumyspen qamtýdyń keshendi jospary qabyldandy
Atalǵan jospardy Úkimet músheleri aldynda tanystyrǵan Eńbek jáne halyqty áleýmettik qorǵaý mınıstri Serik Ábdenovtiń aıtýynsha, búgingi tańda elimizde jasy 50-den asqan jumysshylardyń úlesi halyqtyń ekonomıkalyq belsendi jalpy sanynyń nebári 6,3 paıyzyn ǵana quraıdy. Oǵan qosa, elimizdiń statıstıka agentiginiń málimeti boıynsha olardyń qoǵamdyq óndiriske qatysýy jastarynyń artýyna baılanysty azaıyp keledi.
«Sondyqtan, bul jas sanatyndaǵy azamattardyń jetkilikti zeınetaqy jınaǵyn jasaýǵa kómektesý jáne jumyssyzdyqtyń jalpy deńgeıin tómendetý úshin QR Eńbek jáne halyqty áleýmettik qorǵaý mınıstrligi birqatar sharalar usynady»,-dedi ol.
Mınıstrdiń atap ótýinshe, atalǵan keshendi jospar múddeli memlekettik organdarmen kelisilgen. Buǵan qosa, josparda halyqaralyq eńbek uıymynyń usynystary eskerilgen. Bul usynystar jumys istegisi keletin barlyq egde jastaǵy adamdarǵa jumysqa turýy úshin múmkindik berý, qart adamdardyń áleýmettik-ekonomıkalyq ári saıası úlesin taný, aýyldyq óńirlerdegi ómir men ınfraqurylym jaǵdaıyn jaqsartý, úzdiksiz bilim berý, kásibı daıyndaý, zeınet jasyndaǵy adamdardyń áleýeti men arnaýly bilimin paıdalaný sııaqty jaıttardy qamtıdy.
«Keshendi jospar búgingi tańda memlekettik jáne salalyq baǵdarlamalardy júzege asyrý aıasynda jumys oryndaryn qurýdy qamtıdy. Atap aıtqanda, áıelderdiń Údemeli ındýstrııalyq-ınnovatsııalyq damý memlekettik baǵdarlamasyna keńinen tartylýy, «Bıznestiń jol kartasy -2020» baǵdarlamasy aıasynda 50 jastan asqan tulǵalar arasynda kásipkerlikti yntalandyrý kózdelgen»,-dedi S. Ábdenov.