Úkimet otyrysyna kele jatqanymda Kcell-de baılanys bolmady – mınıstr Mýsın

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ınternet sapasyna qatysty túsinik berdi, dep habarlaıdy QazAqparat tilshisi.

«Búgin Activ/Kcell abonentterinde on mınýttyq aqaý boldy. Úkimet otyrysynyń aldynda «Qazaqtelekomnyń» basqarma tóraǵasy Qýanysh Esekeevke qońyraý shalyp, shaǵymdandym. Uıaly baılanystyń sapasyn men de tekserip turamyn. Úkimet otyrysyna kele jatqanda mende Kcell-de baılanys bolmady, keıin «Qazaqtelekom» basshysy 10-15 mınýttyq tehnıkalyq aqaý shyqqanyn aıtty», - dedi Baǵdat Mýsın Úkimet otyrysynan keıin BAQ ókilderiniń saýalyna jaýap bere turyp.

Sondaı-aq vedomstvo basshysy Activ/Kcell abonentterinde bolǵan tehnıkalyq aqaýdyń sebebin naqtylaıtynyn aıtty.

«Qazir «Qazaqtelekomda» 3G-di 4G, 5G-ge aýystyrý boıynsha jumys júrip jatyr. Sondyqtan tehnıkalyq aqaýlar bolýy múmkin», - deıdi ol.

Aıta ketsek, búgin qazaqstandyqtar Activ/Kcell ınternetiniń sapasyna taǵy shaǵymdanǵan edi.