Úkimet otyrysy shekarada qaza bolǵandardyń qurmetine bir mınýt únsizdikpen bastaldy
ASTANA. 5 maýsym. QazAqparat - Búgin Úkimet otyrysynda Mınıstrler kabıneti shekarada qaza bolǵandardy bir mınýt únsizdikpen eske aldy.
«Búgingi kúndi Elbasy Qazaqstan Respýblıkasynda shekarashylardyń qaza tabýyna baılanysty ulttyq azaly kún dep jarııalady», - dep toqtalǵan Premer-Mınıstr Kárim Másimov, otyrysqa qatysýshylarmen birge qaza bolǵandardy 1 mınýt únsizdikpen eske aldy.
Eske salaıyq, Memleket basshysy Nursultan Nazarbaevtyń Ókimimen shekarashylardyń qazaǵa ushyraýyna baılanysty búgin Qazaqstan Respýblıkasynda ulttyq aza tutý jarııalandy.
15 adam - 14 shekarashy men bir qoryqshy qaza tapqan lańkestik akt mamyr aıynyń 27-sinen 28-ine qaraǵan túni boldy. «Sary bókter» zastavasynyń «Arqankergen» shekara beketi Almaty oblysy Úsharal qalasynyń aýdan ortalyǵynan 220 shaqyrym jerde, taýda ornalasqan.
Shekarashylar qyzmetke kelesi óńirlerden keldi: Atyraýdan - 4; Aqtóbeden - 2; BQO-dan - 1; Qaraǵandydan - 2; Jambyldan - 2; Pavlodardan - 1; Almatydan - 3.
Búgin respýblıkalyq gazetterdiń birinshi betterinde kóńil kóteretin aqparattar, kúldirgi áńgimeler ornalastyrylmaıdy, kóńil kóterýge baǵyttalǵan telebaǵdarlamalardyń, sondaı-aq memlekettik BAQ-tarda jarnalamalardyń kórsetilimi toqtatylady. Barlyq memlekettik mekemelerdiń, kásiporyndar men uıymdardyń ǵımarattarynda memlekettik Týlar túsiriledi.
