Úkimet otyrysy: Prezıdent turǵyn úı qurylysy baǵdarlamalaryn júzege asyryp jatqan jaýapty memlekettik organdarǵa eskertý jasady
ASTANA. 27 qańtar. QazAqparat /Rýslan Ǵabbasov/ - Elbasy búgin Úkimet otyrysynda turǵyn úı qurylysy salasyn ıgerýde jaýapty memlekettik organdar erkinsip ketkendigin aıtty.
«Mende turǵyn úı qurylysy boıynsha eskertý bar. Turǵyn úı qurylysy baǵdarlamasy aıasynda ótken jyly 138 myń sharshy metr arendalyq úı tapsyrý kózdelgen bolatyn. Nátıjesinde, 100 myń sharshy metrden sál astamy ǵana tapsyryldy»,-dedi Elbasy.
«Budan burynǵy turǵyn úı qurylysy baǵdarlamasy aıasyndaǵy nysandar áli kúnge deıin tapsyrylmaǵan. Eger jumys bylaı jalǵasatyn bolsa, onda qarjyny ne úshin bólip otyrmyz»,-dep toqtalǵan Prezıdent: «Erkinsip kettińder. Osy másele boıynsha, biz budan buryn daǵdarysty eńserý baǵdarlamasyn júzege asyrǵanda barlyq ákimder jumys istep, bul baǵyttaǵy sharalar nátıjeli bolǵan edi. Al, qazir barlyqtaryń dem ala bastadyńdar, jumys isteýdi qoıdyńdar. Qarjy resýrstary bólinip jatyr. Munan basqa endi ne kerek»,-dep eskertý jasady N. Nazarbaev.
