Úkimet otyrysy: Bıýdjetti ıgermegen laýazymdy tulǵalardy jaýapqa tartý usynyldy
NUR-SULTAN. QazAqparat – Ótken jyly respýblıkalyq bıýdjetten bólingen nysanaly transfertterdi 2 qala men 3 oblys ákimdigi ıgere almady. Bul týraly Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.
«2020 jyly óńirlerge kózdelgen nysanaly transfertter tolyq kólemde bólindi jáne 2,2 trln teńgeni qurady. Aldyn ala derekter boıynsha, jergilikti jerlerde 99,4 paıyzy ıgerilgen. Atqarylmaǵany – 13 mlrd teńge, onyń ishinde 2 mlrd teńge – únemdeý, 11 mlrd teńge ıgerilmedi. Eń kóp ıgerilmeý Nur–Sultan, Almaty qalalarynda, Pavlodar, Aqmola jáne Qyzylorda oblystarynda qalyptasty», - dedi mınıstr.
Onyń aıtýynsha, ótken jyly respýblıkalyq bıýdjettiń parametrleri eki ret naqtylanǵan bolatyn. Bul rette, bıýdjet zańnamasyna sáıkes shyǵys bóligi respýblıkalyq bıýdjettik baǵdarlamalar ákimshileriniń jáne jergilikti atqarýshy organdardyń ótinimderi boıynsha 8 ret túzetildi.
«Degenmen, jyl qorytyndysy boıynsha bizde respýblıkalyq deńgeıde de, nysanaly transfertter boıynsha jergilikti deńgeıde de ıgerilmeý oryn aldy. Osyǵan baılanysty memlekettik organdardyń tıisti laýazymdy tulǵalaryn jaýapkershilikke tartý máselesin qarastyrý usynylady», - dedi Erulan Jamaýbaev.
