Úkimet otyn boıynsha ahýaldy turaqtandyrý sharalaryn qabyldap jatyr – Álıhan Smaıylov
Kásiporyn dırektory Qýanysh Bıshimov 8-27 shilde aralyǵynda josparly jóndeý jumystary júrgizilgenine qaramastan, zaýyttyń 7 aıdyń qorytyndysy boıynsha dızel otynyn, benzındi jáne basqa da ónim túrlerin shyǵarý boıynsha kórsetkishterdi asyra oryndaǵanyn habarlady. Úkimet basshysy munyń kúzgi dala jumystary qarsańynda mańyzdy ekenin atap ótti.
«Kásiporynnyń turaqty jumys isteýi, janar-jaǵarmaı materıaldarynyń barlyq josparlanǵan kólemi óndirilip, naryqqa ýaqytyly jetkizilýi óte mańyzdy», — dedi Álıhan Smaıylov.
Premer-Mınıstr qazirgi ýaqytta Úkimettiń ishki naryqtaǵy jaǵdaıdy turaqtandyrý boıynsha sharalar qabyldap jatqanyn aıtty. Sebebi, Úkimet basshysynyń aıtýynsha, dızel otyny men benzın kórshi elderge shyǵarylǵan jaǵdaılar bar.
«Janar-jaǵarmaı materıaldary boıynsha táýekelderdi barynsha azaıtý maqsatynda biz qazir ishki tutynýshylar úshin baǵalardy ustap turý jáne syrtqy tutynýshylarǵa arnap baǵalardy túzetýge baǵyttalǵan sheshimderdi ázirlep jatyrmyz. Baǵalar kórshi elderdiń naryqtaryna saı kelýi tıis. Bul bizdiń azamattar men bıznesti janar-jaǵarmaı materıaldarymen turaqty qamtamasyz etýge múmkindik beredi», — dedi Álıhan Smaıylov.
Sondaı-aq PMHZ basshylyǵy kásiporynǵa kelip túsetin munaıdyń sapasy jáne jabdyqty satyp alý kezinde erkindikti barynsha qamtamasyz etý máselelerin kóterdi. Úkimet basshysy tıisti sheshimder qabyldaý úshin memlekettik organdarǵa atalǵan máselelerdi pysyqtaýdy tapsyrdy.
Foto: primeminister.kz
