Úkimet otandyq kólik markasyn jasap shyǵarýdy tapsyrdy
ASTANA. QazAqparat - Qazaqstannyń avtobıznes qaýymdastyǵy otandyq kólik markasyn ázirleýge kiristi, dep xabarlaıdy QazAqparat tilshisi.
Uıym basshysy Andreı Lavrentevtiń aıtýynsha, sheteldik ınvestorlar da qazaqstandyq kóliktiń markasyna qarjy salýǵa daıar.
«Qazirgi kezde biz osy máseleni jan-jaqty zerdelep jatyrmyz. Máselen, qytaılyq «Jac» kompanııasy qazaqstandyq brendti jasap shyǵýǵa múddeli. Soǵan qarjy quıýǵa da daıyn. Ol ózbektiń «Uz-Daewoo» nemese reseılik «Lada» sııaqty otandyq kólik markasy bolady. Osy saladaǵy jumys naqty qaı ýaqytta aıaqtalatynyn aıta almaımyn. Degenmen, tapsyrma bar. Úkimet te naqty mindet qoıdy. Eń bastysy, ınvestorlar tarapynan qyzyǵýshylyq bar. Bálkim, aldaǵy ýaqytta qazaqstandyqtarǵa qýanyshty xabardy jetkizip qalarmyz», - dedi A.Lavrentev Astanada ótken baspasóz máslıxatynda.
Onyń sózine qaraǵanda, ázirshe otandyq kólik markasyna qatysty naqty ataýlar joq. «Jac» kompanııasy tarapynan usynys boldy. Endi ony qolǵa alyp, iske asyrý qajet.
«Osy saladaǵy jumys endi bastaldy deýge bolady. Ázirshe, naqty bir nárse aıtý qıyn. Otandyq markaǵa qatysty ataýlar da joq. Shynymdy aıtsam, osy máselege qatysty aqparattyń egjeı-tegjeıin aıta almaımyn», - dep atap kórsetti A.Lavrentev QazAqparat tilshisine bergen suxbatynda.
Aıta keteıik, búgin Qazaqstannyń avtobıznes qaýymdastyǵy ótken jyldyń qorytyndysyn shyǵardy. Uıymnyń vıtse-prezıdenti Anar Maqashevanyń aıtýynsha, ótken jyly qazaqstandyqtar 60 myń jańa kólikti satyp aldy. Sonyń teń jartysy - óz elimizde qurastyrylǵan avtomobılder. Jalpy, Qazaqstan xalqy jańa kólikterdi satyp alýǵa 547 mlrd teńgeni jumsady. Bul 2017 jylmen salystyrǵanda 24 protsentke artyq.
