Úkimet óńirlerdegi saýda nysandaryna kelýshilerge tegin maska taratýǵa keńes berdi

«Nur-Sultan men Almaty qalasynan basqa óńirlerdegi iri saýda nysandaryna mynadaı keńester berilip otyr. Nysanǵa kelýshilerdi tek maskamen kirgizý kerek. Azamat maskasyz kelse, olarǵa aqysyz maska taratý usynylady. Barlyq kelýshige koronavırýstyń aldyn alý boıynsha estelik paraqshalar berilýge tıis. Bazarlarmen qosa iri saýda-oıyn saýyq ortalyqtarynyń jumys ýaqyty saǵat 10.00-den 18.00-ge deıin dep bekitiledi. Azyq-túlik emes bazarlardyń ýaqyty saǵat 11.00-den 17.00-ge deıin bolýy kerek», - dedi Eraly Toǵjanov Úkimettiń baspasóz ortalyǵynda ótken onlaın rejimdegi brıfıng barysynda.

Úkimet basshysynyń orynbasary saýda-oıyn saýyq ortalyqtarynda barlyq kınoteatr, balalar ortalyǵy, adam kóp jınalatyn kez kelgen oıyn saýyq sharasy toqtatylatynyn eske saldy.

«Bul kezde dárihanalar men dúkender, dúńgirshekter jumys isteı beredi. Biraq sanıtarlyq óńdeý men qaýipsizdiktiń qatań sharalary saqtalady», - dedi ol.