Úkimet óńdeý kásiporyndardyń nesıelerin jeńildetýdi qoldady
ASTANA. QazAqparat - QR Premer-Mınıstri Baqytjan Saǵyntaev ónim óńdeý salasyndaǵy kásiporyndardy memlekettik qoldaý kartasyn iske asyrýǵa tapsyrma berdi.
Atalǵan qujattyń aıasynda naqty birneshe sala boıynsha ónim óńdep jatqan nysandardyń nesıelerin barynsha jeńildetip, ónerkásipti jańartýǵa, tipti jańa nysandardyń qurylysyna aqsha bólinbekshi, dep xabarlaıdy QazAqparat tilshisi.
"Negizi, óńdeý kásiporyndarynyń kartasy buǵan deıin jan-jaqty talqylandy. "Atameken" palatasy da atalǵan bastamany qoldap otyr. Biz de negizgi baǵyttaryn qoldaımyz. Degenmen, búgin kásipkerler palatasy tarapynan aıtylǵan usynystardy eskere otyryp, belgilengen tártip boıynsha keńsege engizip, ony qabyldaý qajet bolady", - dep atap kórsetti Baqytjan Ábdiruly.
Aıta keteıik, Úkimettiń búgingi otyrysy barysynda QR Aýyl sharýashylyǵy mınıstri Asqar Myrzaxmetov ónim óńdeý kásiporyndarynyń kartasy aıasynda memlekettik qoldaýǵa ıe bolatyn naqty nysandardyń anyqtalǵanyn jetkizdi. Onyń aıtýynsha, búginde respýblıka boıynsha ondaı nysandardyń sany 1 345-ti quraıdy. Alaıda qazirgi ımporttyq taýarlardyń kólemin eskere otyryp, ónim óńdeýdiń naqty 9 baǵyty anyqtaldy. Atalǵan baǵyttar boıynsha 435 kásiporyn jumys isteıdi. Sonyń ishinde sút, et, qant qyzylshasy, kartop, maıly daqyldar, bıdaı, kókónis, teri men jún óńdeý oryndary bar. Dál osy salalarda jumys istep jatqan kásiporyndarǵa memlekettik qoldaý jasalmaqshy. Aýyl sharýashylyǵy mınıstrligi olarǵa óz ónerkásipterin jańartýǵa, sondaı-aq jańa kásiporyndardy salýǵa jeńildetilgen nesıelerdi berýdi usynyp otyr.
"Atalǵan baǵyttar boıynsha berilgen nesıelerdiń mólsherlemesin sýbsıdııalaýǵa bolady. Máselen, syıaqy stavkasyn tómendetý boıynsha sýbsıdııany 4 paıyzdyń kóleminde bekitý týraly usynys bar. Oǵan 24,1 mlrd teńge qajet. Nesıe stavkasyn arzandatýǵa arnalǵan sýbsıdııany 10 paıyzǵa deıin berýge bolady. Osy maqsatqa 38,1 mlrd teńge kerek. Al jańa kásiporyndar men eski ónerkásipterdi jańartý sharalaryna taǵy 50 mlrd teńge qajet bolady. Jalpy, óńdeý kásiporyndarynyń Kartasyn tolyǵymen iske asyrýǵa tórt jylda 112,1 mlrd teńge ketedi", - dep atap kórsetti Asqar Myrzaxmetov.
