Úkimet músheleri SQO-da «Serpin» baǵdarlamasymen kelgen stýdenttermen kezdesti
PETROPAVL. QazAqparat - Premer-Mınıstrdiń orynbasary Gúlshara Ábdiqalyqova bastaǵan úkimettik delegatsııa músheleri Petropavlda «Serpin-2050» baǵdarlamasymen oqyp jatqan stýdenttermen jáne ońtústikten soltústikke qonys aýdarǵan turǵyndarmen kezdesti, dep habarlaıdy QazAqparat tilshisi.
Qazir SQO-da «Serpin-2050» baǵdarlamasy aıasynda 1,5 myńǵa jýyq jas bilim alyp jatyr. Olarǵa jataqhana, bilim alý - tegin. Budan basqa, shákirtaqy alady. Endigi maqsat - olardyń osy óńirde turaqtap qalýyna jaǵdaı jasaý.
«Baǵdarlama boıynsha oqýǵa kelgenime esh ókinbeımin. Qazir óndiristik tájirıbeden ótip jatyrmyn. Bizge jan-jaqty qoldaý bar. Oqýdy aıaqtaǵan soń osy jaqta qalyp, eńbek etýim múmkin», - deıdi M.Qozybaev atyndaǵy Soltústik Qazaqstan memlekettik ýnıversıtetiniń stýdenti Jumagúl Serikova.
Málim bolǵandaı, 2016-2018 jyldary SQO-ǵa 719 otbasy kóship keldi. Bıyl taǵy 622 otbasy keletini josparlanǵan. Olardyń 60-y Qyzyljar óńirine qonystanyp úlgerdi. Halqy tyǵyz ornalasqan óńirlerden jumys kúshi tapshy oblystarǵa qonys aýdarǵan turǵyndarmen Úkimet músheleri kezdesip, jaǵdaılaryn bildi.
Marjan Balıeva osydan 5 jyl buryn Jambyl aýdanyna Ońtústik Qazaqstannan otbasymen qonys aýdarǵan eken. Qazir erli-zaıypty bıýdjettik salada eńbek etedi, tabystary jaqsy. Qoralaryndaǵy maldyń sany 180-ge jetken. Jaqynda qurylys materıaldaryn shyǵaratyn tseh ashýdy josparlap otyr.
«Basynda qınaldyq. Buryn kórmegen, bilmegen jerge keldik. Qıyndyqtyń bárin jeńe bildik. Úsh balam bar. Joldasym ekeýimiz de eńbek etemiz. Jaqynda ońtústikke baryp, taǵy 13 adamdy kóshirip ákeldik. Solardy jumyspen qamtyp otyrmyz. Mal basyn kóbeıtemiz. Jaıylym jetkilikti, jumys isteımin degen adamǵa qoldaý bar», - deıdi Jambyl aýdanynyń turǵyny Marjan Balıeva.
Oblys ákiminiń orynbasary Asqar Saqypkereevtiń aıtýynsha, ońtústikten kelgen aǵaıyn úshin óńirde jańa turǵyn úıler salynady. Qazir myńnan asa bos jumys orny bar.
«Eki jyldyń ishinde túrli sebeptermen soltústik óńirlerden 99 otbasy keri kóship ketken. Olardyń oblysta qalýy úshin barynsha jaǵdaı jasaý qajet. Kásibin ashý úshin tegin granttar, shaǵyn nesıelerdi berýdi qarastyrý kerek. Baspana máselesin de baqylaýda ustaý kerek», - dedi QR Eńbek jáne halyqty áleýmettik qorǵaý mınıstri Berdibek Saparbaev.
