Úkimet músheleri Kókshetaýda salynyp jatqan úılerde boldy
KÓKShETAÝ. QazAqparat - Úkimet basshysynyń orynbasary Gúlshara Ábdiqalyqova bastaǵan top jumys saparymen Aqmola oblysynda boldy. Top múshesi QR Investıtsııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov Kókshetaýda «Nurly jer» jáne «7-20-25» baǵdarlamalary boıynsha salynyp jatqan turǵyn úılerdiń qurylys jumystarymen tanysty, dep habarlaıdy QazAqparat tilshisi.
M.Jaıymbetov Aqan seri kóshesiniń boıynda «Alýa Stroı» JShS jáne «Djakýpov» JK júrgizip jatqan turǵyn úı keshenderiniń qurylys alańynda boldy. «Djakýpov» JK salyp jatqan «Brılıant» turǵyn úıiniń qurylysy ótken jyldyń kúzinde bastalyp, 2019 jyldyń sońynda paıdalanýǵa berý josparlanǵan.
«72 páterli turǵyn úıdiń 30-35 paıyzy «7-20-25» baǵdarlamasy boıynsha berilse, qalǵany jeke adamdarǵa satylady», - dedi «Djakýpov» qurylys kompanııasynyń basshysy Maqsat Negmetjanov.
Qurylys jumystarynyń sapasyn joǵary baǵalaǵan komıtet tóraǵasy budan keıin Abylaı han dańǵyly, Saryarqa jáne Borovskoı shaǵynaýdandarynda salynyp jatqan turǵyn úılerde bolyp, kópbalaly jáne áleýmettik jaǵynan az qamtylǵan otbasylardy baspanamen qamtamasyz etýde «Nurly jer» jáne «7-20-25» baǵdarlamalarynyń tıimdi tustaryn atap ótti.
Komıtet tóraǵasy Marhabat Jaıymbetov turǵyn úı qurylysymen aınalysatyn «Regıon stroı» JShS-da bolǵanda kópbalaly otbasylarǵa salynatyn úıler jáne olar kimderge beriletini týraly aıtyp berdi. Sondaı-aq eldi mekenderdi taza aýyzsýmen qamtý máselesine de toqtaldy.
«Aldaǵy jeti jyl ishinde osy maqsatqa memleketten 140 mıllıard teńge qarajat bólinbek. Baǵdarlama júzege asqan kezde barlyq eldi meken taza sýmen qamtamasyz etiletin bolady. Nur-Sultan tóńiregindegi eldi mekenderde de birqatar túıindi jaılardyń bar ekendigi jasyryn emes. Máselen, Qosshy, Qoıandy, Talapkerler aýyldary. Ol jerlerdegi qıyn túıin sheshimin tapqan soń oblys ortalyǵyna irgeles qonystanǵan eldi mekenderdiń máseleleri de mundaı janashyrlyqtan qalys qalmaıdy»,- dedi Marhabat Jaıymbetov.
