Úkimet músheleri Qaraǵandydaǵy eńbek daýlary máselelerin talqylady
Qaraǵandy óńirine jumys sapary barysynda Gúlshara Ábdiqalyqova oblys ákimdiginde áleýmettik áriptestik pen áleýmettik jáne eńbek qatynastaryn retteý jónindegi respýblıkalyq úshjaqty komıssııanyń otyrysyn ótkizdi.
«Eńbek daýyn týyndatatyn basty alǵysharttardyń biri jalaqy deńgeıiniń naqty eńbek jaǵdaılary men aǵymdaǵy ekonomıkalyq ahýalǵa sáıkes kelmeýi bolyp tabylady», - dedi kezdesýge qatysýshylar.
«Búgingi basty mindet - eńbek daýlarynyń aldyn alý. Barlyq áleýmettik shıelenister eńbek daýynyń nátıjesinde týyndaıdy. Olardyń sebebi - jalaqy boıynsha bereshekter men jumys ornynyń qysuarýy. Qaýipsiz eńbek jaǵdaılaryn jasaý úshin respýblıkalyq Jol kartasy ázirlendi. Óńirlerde osyndaı kartalardy qurý qajet. Bıznestiń áleýmettik jaýapkershiligi boıynsha jumysty da jalǵastyrý kerek», - dedi QR Eńbek jáne halyqty áleýmettik qorǵaý mınıstri Berdibek Saparbaev.
Óz kezinde Qaraǵandy oblysynyń ákimi Erlan Qoshanov eńbek daýlary boıynsha óńirde oń kórsetkishter baıqalatynyn atap ótti.
«Eger sońǵy 7 jylda oblysta 10 eńbek daýy týyndasa, 2018 jyly birde - bir kelispeýshilik tirkelmegen. Biz bul baǵytta turaqty monıtorıng júrgizýdemiz. Kún saıyn áleýmettik shıelenis oshaqtarynyń kartasy jańartylyp, qadaǵalanady. Osy kartaǵa sáıkes, bıylǵy jyly bizdiń oblysta bul máselege qatysty oń ózgerister baıqalyp otyr. Bul der kezinde problemaǵa den qoıý jáne eńbek daýlaryn sheshý boıynsha sharalar qabyldaý nátıjesinde qol jetkizip otyrǵan jetistigimiz», - dedi Erlan Qoshanov.
Óńir basshysy táýekelderdi basqarý júıesin engizý týraly da toqtala ketti. Atalmysh júıe aıasynda árbir shaǵymǵa qatysty kásiporyndarda jedel túrde sharalar qoldanylady. Sonymen qatar, oblysta jalaqy boıynsha bereshekke jol bermeý boıynsha memlekettik organdardyń ózara is-qımyl algorıtmi ázirlendi.
Ákimniń aıtýynsha, oblysta jumys berýshilermen eńbek quqyqtaryn qamtamasyz etý, jumys oryndaryn saqtaý boıynsha 4000-ǵa jýyq memorandýmǵa qol qoıyldy. Birinshi Elbasynyń jalaqyny kóterý týraly bastamasyn oblystyń 39 myń kásiporny qoldady, onda 300 myńǵa jýyq adam eńbek etedi, dep habarlady óńir basshysy.
Oblysta kásipodaqtardyń rólin kúsheıtý úshin Tatýlasý ortalyǵy quryldy. Eńbek ujymdarynda tálimgerlik ınstıtýty damýda.
Erlan Qoshanov zańnamalyq sheshimdi talap etetin problemalarǵa da nazar aýdardy. Aımaq basshysy qyzmetkerlerdiń quqyǵyn qorǵaý úshin aýtstaffıng ınstıtýtyn retteý kerek dep esepteıdi.
«Búgingi kúni áleýmettik áriptestik salasyndaǵy negizgi mindetterdiń biri áleýmettik eńbek janjaldarynyń týyndaýynyń aldyn alýy bolýy tıis. Áleýmettik áriptestiktiń barlyq qatysýshylaryna óńirlerdegi áleýmettik shıelenisti monıtorıngileý, jalaqy boıynsha bereshekterdi boldyrmaý, óndiristik jaraqattanýdy tómendetý máselelerin erekshe baqylaýǵa alý qajet. Kórip otyrǵanyńyzdaı, biz respýblıkalyq úshjaqty komıssııanyń jumys formatyn ózgertemiz. Jáne óńirlerden osyndaı belsendi jumys kútemiz. Osynyń barlyǵy jaı ǵana qaǵaz júzinde qalyp qoımaýy tıis», - dedi Gúlshara Ábdiqalyqova.
Vıtse-premer áleýmettik áriptestiktiń barlyq nysandaryn damytýǵa, salalyq kelisimder men ujymdyq sharttar boıynsha mindettemelerdi oryndaý boıynsha jaýapkershilikti kúsheıtýge shaqyrdy.
Foto: karaganda-region.gov.k
