Úkimet músheleri endi mobıldi planshetter arqyly baılanysady
azannyń 26-sy. QazAqparat /Rýslan Ǵabbasov/ - Úkimet músheleri endi mobıldi planshetter arqyly baılanysady. Bul týraly búgin Astanada 4 G ilki jobasyn tanystyrý kezinde Úkimet basshysy Kárim Másimov málim etti.
Atalǵan baılanysty ornatý týraly 1 aı buryn Baılanys jáne aqparat mınıstrligine tapsyrma bergenine toqtalǵan K. Másimov: «Kesheden bastap Úkimettiń barlyq músheleri mobıldi planshetterge kóshti. Eń qyzyǵy, keshe birinshi kúni jumys ýaqytynda baılanysqan kezde Úkimet músheleriniń barlyǵy jaýap bergen edi. Al keshke qaraı planshetter arqyly Úkimet múshelerimen baılanysqa shyǵyp edim, maǵan jaýapty olardyń kómekshileri qaıtardy. Atap aıtqanda, bul jabdyqtar Úkimet músheleriniń qolynda bolýy tıis. Máselen, bul qurylǵymen men ózim jumys isteımin»,-dep atap ótti Premer-Mınıstr.
Aıta keteıik, mobıldi planshetter ınternet jelisi arqyly beıne konferentsııalar rejıminde, sondaı-aq hat-habar túrinde baılanysqa shyǵýǵa múmkindik beredi.
Esterińizge salyp óteıik, qyrkúıektiń 21-i kúni Úkimettiń Baılanys jáne aqparat mınıstrliginde ótken búgingi kóshpeli otyrysynda Premer-Mınıstr mınıstrlikterdiń jáne agenttikterdiń basshylaryn Úkimet basshysynyń tapsyrmasyn shuǵyl túrde alyp otyrýǵa múmkindik beretin elektrondyq jańashyldyqtardy paıdalanýǵa shaqyrǵan bolatyn. Premer-Mınıstr bul oraıda mınıstrlikter men agenttikterdiń basshylary, sonyń ishinde ózi de, «qupııa emes» elektrondy poshtalaryn BlackBerry-ge (bunyń kómegimen uıaly telefon arqyly elektrondy poshtany paıdalanýǵa bolady) shyǵarý qajet dep esepteıtinin jetkizgentuǵyn. Osy oraıda K. Másimov Baılanys jáne aqparat mınıstrligine Premer-Mınıstrdiń keńsesimen, sondaı-aq «Qazaqtelekom» komanııasymen birlesip bul máseleni pysyqtaýǵa bir apta ýaqyt bergen-di. K. Másimov qaramaǵyndaǵylarǵa tapsyrma júkteý úshin bul qyzmet túrin paıdalanýǵa qulyqty ekenin jáne qaramaǵyndaǵylar da osy qyzmet túri arqyly ózine tikeleı ótinish jasaı alatynyn atap kórsetken bolatyn.
Onyń pikirinshe, aqparattandyrý úderisin Úkimet músheleri aldymen ózinen bastamasa, is bir ornynan qozǵalmaıdy. «Biz bul máseleni ornynan qozǵaýymyz kerek. Men memleket basshylarynyń, úkimet basshylarynyń avtomobılde otyryp «qupııa emes» poshtalardy paıdalanǵanny kórdim», degen bolatyn Úkimet basshysy tapsyrmany berip turyp.
