Úkimet munaıdy tıimdi óndirýdiń deńgeıin arttyrý maqsatynda jer qoınaýyn paıdalanýshylardy yntalandyrady
Bul týraly búgin munaı-gaz sektoryn damytý máselesine arnalǵan Májilistegi parlamenttik tyńdaýda QR Premer-Mınıstriniń birinshi orynbasary Baqytjan Saǵyntaev málim etti.
«Qarashyǵanaq jobasyn keńeıtý jobasy aıasynda Úkimet ken ornynda gazdy óndirý kólemin arttyrý múmkindigin jáne suıyq kómirsýtekterdi qaıta óńdeý boıynsha jańa tehnologııalyq jeliniń qurylysyn qarastyrýda. Ol úshin búginde Tujyrymdama ázirlendi, sondaı-aq tıisti zertteý sharalary iske asyrylýda. Jobany iske qosý 2022 jylǵa josparlanyp otyr. Alaıda, atap ótken iri jobalardan basqalary, ıaǵnı qazaqstandyq ken oryndarynyń jartysynan astamy búgingi tańda óndirýdiń sharyqtaý sheginen ótip, endi óndirýdiń tómen deńgeıine tústi»,-dedi Saǵyntaev.
Osy oraıda Elbasynyń Úkimetke munaıdyń ken ornynan óndirý koeffıtsentindegi búgingi 30 paıyz kórsetkishin taǵy 5-7 paıyz kóleminde arttyrýdy qarastyratyn tehnologııalyq saıasatty júzege asyrý tapsyrmasyn bergenin eske salyp ótken ol, qazirgi kezde álemde bul kórsetkish 50 paıyz deńgeıinde ekenin jetkizdi.
Onyń sózine qaraǵanda, jyl sońyna deıin elimizdiń ken oryndarynda munaıdy tıimdi óndirýdi arttyrý boıynsha jobany iske asyrýdyń jaǵdaıy, josparlary jáne boljamy turǵysynda saraptamalyq taldaý júrgizilmek.
Osy oraıda Úkimet munaıdy tıimdi óndirýdiń deńgeıin arttyrý maqsatynda jer qoınaýyn paıdalanýshylardy yntalandyrýdyń naqty sharalaryn qabyldaýdy kózdep otyr.
