Úkimet «Munaı ónimderiniń jekelegen túrlerin óndirý jáne aınalymyn memlekettik retteý týraly» zań jobasyn maquldady
ASTANA. Aqpannyń 23-i. QazAqparat /Ernur Aqanbaı/ - Búgin Úkimet otyrysynda Mınıstrler kabınetiniń músheleri «Munaı ónimderiniń jekelegen túrlerin óndirý jáne aınalymyn memlekettik retteý týraly» zań jobasyn maquldady. Zań jobasy Parlamentke jiberildi,
dep habarlaıdy QazAqparat.
«Men atalmysh zań jobasyn qoldaý qajet dep esepteımin», dedi otyrysta Úkimet basshysy. Energetıka jáne mıneraldyq resýrstar mınıstri Saýat Myńbaevtyń aıtýynsha, atalmysh zań jobasy Elbasynyń janar-jaǵarmaı naryǵyndaǵy baǵany turaqtandyrý jónindegi tapsyrmasyn júzege asyrýǵa baǵyttalǵan. Zań jobasy naryqtaǵy naqty jaǵdaıdy, sonyń ishinde Reseıdiń janar-jaǵarmaı naryǵyndaǵy baǵa qarqynyn nazarǵa alatyn bolady. Sebebi AI-92 jáne AI-93 markaly joǵary oktandy benzınniń 40 paıyzyn Qazaqstan Reseıden ımporttaıdy. Eger janar-jaǵarmaı baǵasyn negizsiz kóterýdi kózdeıtin qandaı da bir is-qımyldar týyndaıtyn bolsa, onda zań aıasynda baǵany retteýge bolady. Bir sózben aıtqanda, jyldaǵydaı janar-jaǵarmaı baǵasynyń aıtarlyqtaı qubylýyna jáne jekelgen óńirlerge janar-jaǵarmaıdyń jasandy tapshylyǵyn qalyptastyrý áreketine jol berilmeıdi. Atalmysh zań jobasy 2014 jylǵa qaraı ishki naryqty toyǵymen otandyq munaı ónimderimen qamtamasyz etýge baǵyttalǵan.
Úkimet otyrysynan keıin jýnalısterge bergen suhbatynda S. Myńbaev AI-92 jáne AI-93 markaly joǵary oktandy benzınderdiń baǵasyn memlekettik retteý júıesi ótken jyldyń jeltoqsan aıynan beri jumys istep kele jatqanyn aıta kele: «Alaıda janar-jaǵarmaıdyń baǵasyn memlekettik retteý júıesi zańnamalyq turǵydan bekitilýi tıis. Jazǵy dızel otynyn, AI-80 markaly benzındi jáne AI-92 jáne AI-93 markaly joǵary oktandy benzındi halyq kóp tutynady. Osylardyń bólshek saýdadaǵy baǵasyn memlekettik retteý júıesi engiziledi. Alaıda janar-jaǵarmaıdyń kóterme baǵasy rettelmeıtin bolady. Bul bólshek saýda úshin aqylǵa qonymdy marjany saqtaýǵa múmkindik beredi», dedi ol.
