Úkimet muqtaj jandarǵa kómekti azyq-túlik túrinde emes, aqshalaı aýdarý usynysyn maquldady

NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen QR Prezıdenti janyndaǵy Tótenshe jaǵdaı rejımin qamtamasyz etý jónindegi memlekettik komıssııanyń kezekti otyrysy ótti, dep habarlaıdy QR Úkimetiniń baspasóz qyzmeti.

Elimizdegi sanıtarlyq-epıdemıologııalyq jaǵdaı týraly densaýlyq saqtaý mınıstri Eljan Birtanov, Nur-Sultan men Almaty qalalarynda bıznes sýbektileri qyzmetiniń jekelegen túrlerin qaıta bastaý máselesi týraly Premer-Mınıstrdiń orynbasary Eraly Toǵjanov, sondaı-aq ákimder Altaı Kólginov pen Baqytjan Saǵyntaev baıandady.

Jedeldikti jáne azamattardyń qaýipsizdigin qamtamasyz etý maqsatynda Memlekettik komıssııa Eńbek jáne halyqty áleýmettik qorǵaý mınıstrligi engizgen azyq-túlik jáne turmystyq jıyntyqtardy zattaı emes, jeke tulǵalardyń shotyna aqshalaı qarajatty aýdarý arqyly berý týraly usynysty maquldady.

«Óńirlerdiń ákimdikteri usynylǵan tetikke sáıkes, kómekti alýshylarǵa aqshalaı qarajattyń ýaqtyly aýdarylýyn qamtamasyz etýi kerek. Karta shottary bolmaǵan jaǵdaıda nemese kómek alýshylardyń jasyna ne múgedektigine baılanysty kelýge múmkindigi bolmasa, sanıtarlyq talaptardy saqtaı otyryp, azyq-túlik jıyntyǵyn úıge jetkizýdi qamtamasyz etý qajet», — dedi A. Mamın.