Úkimet múgedekterdi ońaltý men olardy qoǵamǵa kiriktirýge basa nazar aýdara bastady
TANA. 24 qazan. QazAqparat /Qanat Mámetqazyuly/ - Búgingi kúni elimizde múgedektik pen olardyń problemalaryna kózqaras ózgerdi. Egerde Úkimet buǵan deıin osy máselege ýaqytyly tólemderin tóleý, onyń mólsherin arttyrý turǵysynan qarap kelgen bolsa, qazirgi kúni múgedekter máselesinde eń aldymen ońaltý men qoǵamǵa kiriktirýge basa nazar aýdaryla bastady.
Búgin Parlament Májilisinde «Múmkindigi shekteýli azamattardyń quqyqtaryn qamtamasyz etý máseleleri» taqyrybynda ótken Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
Mınıstrdiń aıtýynsha, bıyl 2009 jyly bastaý alǵan áleýmettik qyzmet reformasynyń birinshi kezeńi aıaqtalyp otyr. «Múmkindikteri shekteýli azamattarǵa baılanysty sońǵy on jyl ishinde jetiden astam zań qabyldandy. Bular birinshi kezekte azamattardyń eńbek etý qabiletinen aıyrylý qateriniń aldyn alýǵa, ekinshiden múgedektikke ushyraǵan jaǵdaıda adamdardy áleýmettik qamsyzdandyrý men qoldaýǵa, onyń ishinde ońaltýǵa baǵyttalǵan. Budan bólek, 2008 jyly Elbasynyń Jarlyǵymen múgedekterdiń quqyqtary men onyń hattamasyna qol qoıyldy. Budan basqa, biz memlekettik mekemelermen, halyqaralyq uıymdarmen jáne úkimettik emes uıymdarmen birlesip otyryp, aldaǵy ýaqytta atqarylatyn Ulttyq is-qımyldar josparyn ázirledik», - deıdi mınıstr.
Onyń aıtýynsha, mınıstrlik eń ózekti máseleniń biri retinde múgediktikke ushyraý qaterleriniń aldyn alýǵa baǵyttalǵan jumystardy jandandyra túsetin bolady. «Ult densaýlyǵyn nyǵaıtý men múgedektikke ákep soǵatyn patologııalardyń taralýyn azaıtý. Bul sharalarǵa tek Densaýlyq saqtaý mınıstrligi ǵana emes, basqa da memlekettik organdardyń belsendi is-áreketteri qajet etiledi. Kásiptik aýrýlar men óndiris jaraqattaryn, jol-kólik apattarynyń sanyn azaıtýdyń mańyzy zor», - deıdi G. Ábdiqalyqova.
