Úkimet, mınıstrlikter men ákimdikter arasyndaǵy ókilettikterdiń arajigin ajyratý usynysy ázirlenedi
«Memleket basshysynyń Joldaýynda aıtylǵan negizgi mindetterdiń biri – memlekettik basqarýǵa ákimshilik reforma júrgizý. Qurylymdyq ózgerister azamattardyń múddelerin qamtamasyz etýge jáne ekonomıkada oń ózgeristerge qol jetkizýge baǵyttalýy tıis. Memlekettik basqarý modeli «halyq únine qulaq asatyn», tıimdi, esep beretin, kásibı jáne pragmatıkalyq memleket qaǵıdattaryna saı damýyn jalǵastyryp, áleýmettik-ekonomıkalyq reformalardy júzege asyrýdyń baǵdary bolýy tıis», - dedi Álıhan Smaıylov búgin Úkimet otyrysynda.
Premer-Mınıstr osy mindetti iske asyrý úshin Ulttyq ekonomıka mınıstrligine memlekettik organdarmen birlesip, Úkimet, mınıstrlikter men ákimdikter arasyndaǵy ókilettikterdiń arajigin ajyratý boıynsha jańa usynystar toptamasyn daıyndaýdy tapsyrdy.
«Ókilettikterdi qaıta bólgende tıisti ortalyq jáne jergilikti memlekettik organdar bıýdjetaralyq qatynastardy eskere otyryp, jańa fýnktsııalar men ókilettikterdi oryndaýǵa daıyn bolýy tıis. Bul reforma Úkimetke salaaralyq máselelerdi sheshýge kóbirek kóńil bólýge múmkindik beredi. Memlekettik organdar basshylarynyń derbestigi men jaýapkershiligi artady «, - dedi Úkimet basshysy.
