Úkimet memlekettik retteý sharalaryn qatańdatýy kerek – Prezıdent turǵyn úı qurylysy jaıly
«Turǵyn úı qurylysy salasynda qordalanǵan kóptegen másele bar. Injenerlik ınfraqurylymnyń jetispeýshiliginen ákimdik turǵyn úı qurylysyn birtindep báseńdetýdi usynady. Al, astanada bala týý kórsetkishi joǵary jáne kóship kelýshiler qatary da kóp. Qurylys qarqynyn báseńdetetin bolsaq, 30 myńdaı adam jumyssyz qalatynyn eskerýimiz kerek. Mundaı máseleler týyndamas úshin qalanyń damýyn júıeli jospalaý qajet», - dedi Prezıdent.
Memleket basshysy astana tıisti ınjenerlik ınfraqurylymmen qamtamasyz etilýi jáne salynyp jatqan nysandardyń barlyǵynda zamanaýı energııa únemdeıtin tehnologııalar qoldanylýy tıistigin aıtty. Sondaı-aq, shamamen 4 myń úleskerdiń máselesi de kún tártibinen túspegenine nazar aýdardy.
«Zańnamalyq bazanyń osaldyǵynan qalada problemalyq nysandar taǵy paıda boýly múmkin. Qazir Astanada 90-nan astam turǵyn-jaı kesheni ruqsat qujattarynsyz salynyp jatyr. Qurylys kompanııalary mardymsyz aıyppuldy tólep, turǵyndar qarajatyn tartýdy jalǵasyra beredi. Úkimet memlekettik retteý sharalaryn qatańdatýy kerek. Qurylys salýshylardyń zańnamany aınalyp ótip, úleskerler qarajatyn tartýyna jol bermeý qajet. Bul jumysqa Qarjylyq monıtorıng agenttigi atsalysýy kerek», - dedi Memleket basshysy.
Sondaı-aq, Prezıdent jer telimin bólý máselesinde ashyqtyq bolýyna talap etti.
«Quzyretti organdarǵa jer telimin bólý máselesinde ashyqtyq joǵy týraly kóp shaǵym túsip jatyr. Áńgime tanymal qurylys kompanııalaryna jasalatyn «erekshe» jaǵdaı týraly. Bul protsess tolyǵymen ashyq bolýy kerek. Jer tsıfrlyq servıster arqyly jáne konkýrs negizinde berilýi tıis. Úkimetke ákimdikpen birge osy máselemen myqtap aınalysýdy tapsyramyn», - dedi Qasym-Jomart Toqaev.
