Úkimet memleket qarjysyna salynatyn nysandardyń sapasyn kóterýdi kózdeıdi

ASTANA. QazAqparat - Úkimettiń búgingi otyrysynda QR Qarjy mınıstri Baqyt Sultanov memlekettik satyp alýlar aıasyndaǵy qurylys kelisimsharttaryn qazynashylyq baqylaýdyń jańa úlgisin tanystyrdy. Premer-mınıstr Baqytjan Saǵyntaev óz kezeginde memleket qarjysyna salynatyn nysandardyń sapasyn barynsha kóterýdi kózdeıtin osy bir tájirıbeni keńinen engizýdi tapsyrdy, dep habarlaıdy QazAqparat tilshisi.

Mınıstr Sultanovtyń aıtýynsha, búginde memlekettik satyp alýlar salasynda bıýdjet aqshasyn jymqyrý faktileri az emes. Sonyń saldarynan memlekettik tapsyrys boıynsha salynatyn qurylys nysandarynyń sapasy syn kótermeıdi. Qurylys kompanııalary bolsa, jobaǵa san alýan ózgeristerdi engizip, nysandy paıdalanýǵa berý merzimin keıinge shegerip jatady. Budan bólek, qurylys salasynda jalǵan kásiporyndar kóp. Osylaısha, sapa da oryndalmaıdy, salyq ta tólenbeıdi.

"Qazirgi mexanızmge sáıkes, bıýdjet qarajaty merdigerlerdiń bankterdegi esep-shottaryna aýdarylǵanda tekseriledi. Odan keıin qarajattyń jumsalýy baqylanbaıdy. Sol sebepti ony qolma-qol aqshaǵa aınaldyrý jaǵdaılary bolyp jatady. Osyǵan baılanysty memlekettik satyp alýlar salasyndaǵy qurylys kelisimsharttaryna qazynashylyq baqylaý júıesin engizý usynylady. Atalǵan júıe tólemderdiń ashyqtyǵyn, salyqtardyń tolyqqandy tólenýin, qurylys sapasynyń baqylanýyn, bıýdjet qarajatynyń maqsatqa saı paıdalanýyn jáne satyp alýlarda otandyq ónimniń artýyn qamtasyz etedi. Sóz joq, bul jańalyq qurylys salasyna aýyr tıedi. Degenmen, onyń arqasynda qurylys nysandarynyń sapasyn kóterip, bıýdjet qarajatynyń tıimdi jumsalýyn qamtamasyz etýge múmkindik bar", - deıdi Sultanov.

Onyń aıtýynsha, jańa júıe aıasynda barlyq merdigerler men sýbmerdigerlerdiń esep-shottary qazynashylyq organdarda ashylady. Al arnaıy sýpervaızerler men ınjınırıngtik kompanııalar qurylys sapasyn baqylaıdy. Bıýdjet qarajatynyń tıimdi jumsalýyn Memlekettik kirister komıteti de qadaǵalap otyrady. Ázirshe, atalǵan júıe negizinde pılottyq jobamen Astana, Aqmola men Qaraǵandy oblystarynda tórt qurylys nysanyn salý josparlanǵan. Osydan keıin otandyq zańnamaǵa ózgerister men tolyqtyrýlar engizip, ol tájirıbeni respýblıka boıynsha taratý jospary bar.

Úkimet basshysy Baqytjan Saǵyntaev atalǵan jospardy mindetti túrde iske asyryp, kelesi jyldan bastap barlyq aımaqtarda engizýdi tapsyrdy. "Men bilemin, qazirgi pılottyq jobany iske asyrýǵa kedergi jasaıtyndar da bolady, qarsylyq bildiretinder de shyǵady. Oǵan qaramaı, osy júıeni oıdaǵydaı júzege asyrýdy tapsyramyn. Bálkim, kelesi jyldan bastap barlyǵy soǵan kóshetin bolady", - dep atap kórsetti Premer-mınıstr.