Úkimet medıtsınalyq saqtandyrý týraly zań jobasyna túzetýlerdi maquldady
ASTANA. QazAqparat - Búgin QR Úkimeti otyrysynda mindetti áleýmettik medıtsınalyq saqtandyrý týraly zań jobasyna túzetýler maquldandy. Zań jobasyn elimizdiń Densaýlyq saqtaý mınıstri E.Birtanov tanystyrdy, dep habarlaıdy QazAqparat.
Birtanovtyń aıtýynsha, mindetti áleýmettik medıtsınalyq saqtandyrý boıynsha zań jobasynda bólingen soma men jarnalardy esepteý nysandary men mólsherlemesin ózgertýge qatysty túzetýler engizý usynylǵan. Sonymen qatar, jarnalar tólemin memleket júzege asyratyn jańa tulǵalar sanattaryn, jańa tóleýshiler sanattaryn engizý usynylady, sonymen qatar MÁMS jáne KTMKK júıesinde Áleýmettik medıtsınalyq saqtandyrý jáne dári-dármekpen qamtý qorynyń jumysyn uıymdastyrý máseleleri retteledi.
Zań jobasynda qordy MÁMS júıesinde, sonymen qatar KTMKK aıasynda biryńǵaı tóleýshi retinde aıqyndaý kózdeledi. Osyǵan baılanysty «Halyqtyń densaýlyǵy jáne densaýlyq saqtaý júıesi týraly» kodeksten KTMKK kórsetý boıynsha qyzmetterdi satyp alýdy júzege asyrý jáne KTMKK kórsetý boıynsha farmatsevtıkalyq qyzmetter fýnktsııalaryn oblystardyń, respýblıkalyq mańyzy bar qalalar men elordanyń memlekettik densaýlyq saqtaýdy basqarý boıynsha jergilikti organdarynyń quzyretinen alyp tastaý qarastyrylǵan.
Sonymen qatar, qordyń qarjylyq turaqtylyǵyn jáne onyń aktıvteriniń saqtalýyn kúsheıtý maqsatyndaǵy túzetýler de kózdelip otyr.
«Jalpy, zań jobasynda densaýlyq saqtaý júıesiniń, onyń ishinde mindetti áleýmettik medıtsınalyq saqtandyrý júıesiniń toqtaýsyz jumysyn qamtamasyz etýge múmkindik beretin negizgi jaıttar qamtylǵan. Zań jobasynyń júzege asyrylýynyń arqasynda respýblıkalyq bıýdjet shyǵyndary qysqarady», - dedi Birtanov.
Úkimet músheleri zań jobasyn biraýyzdan qoldady.
