Úkimet Májiliske usynylatyn zań jobalarynyń sapasyna aıryqsha mán berýi kerek - Májilis Tóraǵasy
ANA. Qyrkúıektiń 2-si. QazAqparat /Qanat Mámetqazyuly/ - Úkimet Májiliske usynylatyn zań jobalarynyń sapasyna aıryqsha mán berýi kerek. Búgin QR Parlamenti Májilisiniń jalpy otyrysynda jıyndy ashyp sóz sóılegen palata Tóraǵasy Oral Muhamedjanov osylaı málim etti.
«Bıýdjet úderisinde Parlament róliniń úzdiksiz artýyna umtylýymyz kerek. Parlament depýtattary bıýdjet jobasyna qoıylatyn nysanaly nuqsaýlary men talaptaryn zań jobasy engizilgenge deıin aıqyndap alýǵa tıis. Bul rette, Prezıdenttiń memlekettik shyǵystardy azaıtý jáne shuǵyl qajettilikter úshin qarjy rezervterin qalyptastyrý týraly tapsyrmasyn eskerý qajet», dedi O. Muhamedjanov. Onyń aıtýynsha, zań shyǵarý úderisi Májilistiń Úkimetpen tyǵyz baılanysta bolyp, qoıan-qoltyq is-áreket jasaýyn talap etedi. Bul rette palata Tóraǵasy Parlament pen Úkimettiń ózara kelisimdi túrde is-qımyl jasaýdy jalǵastyra berýiniń mańyzy zor ekendigine erekshe toqtaldy. Onyń aıtýynsha, osyndaı kelisimdi jumys qana aldaǵy reformalardyń tabysty bolýyn qamtamasyz ete alady.
«Bul turǵyda aıta ketetin másele, Úkimet Májiliske usynylatyn zań jobalarynyń sapasyna aıryqsha mán berýi kerek. Ókinishke oraı, Májilistiń qaraýyna jetilmegen, qalaı bolsa solaı qurastyryla salǵan jobalardyń túsýi jıi oryn alyp turady», dedi spıker.
