Úkimet logıstıka jáne týrızmdi qoldaý sharalaryn jarııalady

NUR-SULTAN. QazAqparat - Áleýmettik mańyzy bar baǵyttar boıynsha jolaýshylar avtobýsynyń qyzmetterine qosylǵan qun salyǵy alynyp tastalmaq. Bul týraly búgin Úkimet otyrysynda elimizdiń ekonomıkasyn qalpyna keltirý jónindegi keshendi jospardy tanystyrǵan QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Logıstıka jáne týrızmdi qoldaý sharalary aıasynda áleýmettik mańyzy bar baǵyttar boıynsha jolaýshylar avtobýsynyń qyzmetterine qosylǵan qun salyǵyn tóleýden bosatý kózdeledi. Týrıstik ınvestıtsııalyq jobalardy iske asyrý kezinde basym týrıstik aýmaqtarda salyq preferentsııalary beriletin bolady. Bul - korporatıvtik tabys salyǵy, múlik salyǵy jáne jer salyǵy boıynsha jeńildikter», - dedi mınıstr.

Onyń atap ótýinshe, temir jol kóligimen júkterdi tasymaldaýǵa arnalǵan ótinimdi oryndamaǵany úshin saqtaý tólemniń 10 eselengen mólsherin 6 aıǵa alyp tastaý usynylady.

«Sondaı-aq, tranzıt kezinde konteınerlik poezdardy kedendik tekserýden ótkizýdi jeńildetý usynylady. Al ımporttaý kezinde tekserý sońǵy stantsııada bir ret júrgiziletin bolady. Shektýge sharalaryn eskere otyryp, temir jol tasymaldaýshylaryn sýbsıdııalaý deńgeıi saqtalady. Kemeler qatynasy qyzmetterine tarıfterdiń shekti deńgeıiniń qoldanylý merzimi uzartylatyn bolady», - dedi Rýslan Dálenov.