Úkimet koronavırýsqa qatysty jaǵdaıdy baqylaýda ustap otyr - Eraly Toǵjanov
NUR-SULTAN. QazAqparat – Premer-Mınıstrdiń orynbasary Eraly Toǵjanov Úkimettiń koronavırýsqa qatysty jaǵdaıdy baqylaýynda ustap, tıisti sharalardy qabyldap jatqanyn aıtty, dep habarlaıdy QazAqparat tilshisi.
«Memleket basshysy Qasym-Jomart Toqaevtyń Qytaıda tirkelgen koronavırýstyń Qazaqstan aýmaǵynda taralmaýyna jol bermeý jóninde Úkimetke naqty uıymdastyrý sharalaryn qabyldaýdy tapsyrǵan edi. Bul máseleni Prezıdent jeke baqylaýynda ustap otyr. Úkimet otyrysynda Premer-Mınıstrdiń qatysýymen kún saıyn qaralýda. Arnaıy is-josparlary búgin de bekitilgen. Atalǵan máseleni jiti qadaǵalaýda ustaý maqsatynda qurylǵan úkimettik vedomstvoaralyq komıssııanyń turaqty jumysy atqarylyp, kúndelikti qajetti sharalar boıynsha naqty sheshimder iske asyrylýda», - dedi Eraly Toǵjanov Úkimettiń baspasóz ortalyǵynda ótken brıfıng barysynda.
Úkimet basshysynyń orynbasary atap ótkendeı óńir basshylaryna da tıisti tapsyrmalar berilip jatqanyn jetkizdi.
«Máseleniń mańyzdy ekeni aıdan anyq. Nege deseńiz ár azamattyń ómiriniń qaýipsizdigin qamtamamyz etý – bárimizdiń negizgi mindetterimizdiń biri. Vırýstyń taralý aımaǵy qysqa merzimniń ishinde tez ósýde. Búgingi tańdaǵy málimetke sáıkes koronavırýs 88,4 myńdaı adamǵa juqqan. 3 myńǵa jýyq adam qaıtys bolǵan. 42,8 myńnan astam adam jazylyp ketken», - dedi ol.
