Úkimet koronavırýsqa qarsy 268 dáriniń shekti baǵasyn pysyqtap jatyr
NUR-SULTAN. QazAqparat - Premer-Mınıstrdiń orynbasary Eraly Toǵjanov shekti baǵasy qoıylǵan dári-dármekterdiń tizbesi ózgeretinin aıtty, dep habarlaıdy QazAqparat tilshisi.
«Koronavırýsqa qarsy dári-dármektiń tapshylyǵyn boldyrmaý úshin uqsas preparattar naryǵynyń konıýktýrasy jáne dárilik zattar men olardy óndirýshilerdiń Qazaqstan naryǵyndaǵy ártúrliligi qaraldy. Ashyq derekkóz derekteri boıynsha depýtattyq saýalda attary atalǵan kardıomagnıl, aspırın, ıbýfen, geparın, sýmamed, ksarelto, kleksan sııaqty dárilik zattar Nur-Sultan, Almaty qalalarynyń dárihanalarynda bar», - dep jazdy Eraly Toǵjanov depýtattyq saýalǵa bergen jaýabynda.
Vıtse-premerdiń aıtýynsha, farmatsevtıkalyq bıznes ókilderi de shekti baǵalardy retteý boıynsha Úkimetke másele kótergen eken.
«Osyǵan baılanysty atalǵan máseleler Úkimette farmatsevtıkalyq bıznes ókilderiniń qatysýymen birneshe ret talqylandy. Qazirgi ýaqytta bıznes ókilderiniń qatysýymen qaıta taldaý qorytyndylary boıynsha koronavırýsqa qarsy 268 preparatqa shekti baǵa pysyqtalýda. Tizbeden 102 preparat alynyp tastaldy, onyń ishinde 43-i – gelder, jaqpa maılar, tamyzatyn dáriler, 59 dáriniń basqa túrleri engizildi. Sondaı-aq, farmatsevtıkalyq bıznes sýbektileriniń bólshek saýda jelisine vırýsqa qarsy preparattardy ýaqtyly jetkizýin qamtamasyz etý máseleleri boıynsha jumys júrgizildi», - dedi Úkimet basshysynyń orynbasary.
Vıtse-premer dárilik zattardyń baǵasy men bar-joǵyn monıtorıng arqyly baqylap otyrý úshin Densaýlyq saqtaý mınıstrliginiń aqparattyq júıeleri men «Atameken» UKP-nyń dárilik zattar derekqoryn ıntegratsııalaý qolǵa alynǵanyn da atady.
Buǵan deıin habarlaǵanymyzdaı, Eraly Toǵjanov koronavırýsqa qarsy dári-dármektiń shekti baǵasyn retteýdiń tetikterin túsindirgen bolatyn.
