Úkimet kirme joldardaǵy tártipti qalpyna keltirý jumystaryn jalǵastyrýda

NUR-SULTAN. QazAqparat - Qazaqstan Respýblıkasy Premer-Mınıstriniń birinshi orynbasary Roman Sklıar kirme joldardyń tarıfteri boıynsha kezekti keńes ótkizdi, dep habarlaıdy primeminister.kz.

Úkimet mundaı qyzmetterdiń obektıvti qunyn anyqtaý boıynsha júıeli jumys júrgizýde. Osylaısha, taldaý barysynda ýákiletti organdar 86 tabıǵı monopolııa sýbektisin anyqtady, olar boıynsha kórsetilgen qyzmetter qunynyń senimdiligine qatysty tıisti sharalar qabyldanatyn bolady.

Qabyldanǵan sharalardyń nátıjesinde birqatar sýbektilerdiń tarıfteri tómendetildi. Mysaly, «Knaýf» (Almaty oblysyndaǵy qurylys materıaldaryn óndirýshi) jáne «Qazhrom» AQ (Aqtóbe oblysyndaǵy ferrohrom óndirýshi) qyzmetteriniń quny vagon/km 2 117,98 teńgeden 147,3 teńgege deıin tómendetildi.

Bul sharalar tasymaldaý shyǵyndaryna jáne osy kompanııalardyń ónimderiniń sońǵy qunyna oń áser etedi.

Budan buryn habarlanǵandaı, bıylǵy 1 aqpanynan bastap elimizdiń birqatar oblysynda (Nur-Sultan, Almaty, Qyzylorda, Batys Qazaqstan, Qostanaı, Almaty, Pavlodar, Aqmola, Qaraǵandy, Shyǵys Qazaqstan, Aqtóbe jáne Soltústik Qazaqstan oblystary) kirme joldardy usyný boıynsha qyzmet kórsetetin 21 sýbektiniń tarıfteri tómendetildi.

Úkimet bul baǵyttaǵy jumysty odan ári jalǵastyratyn bolady.