Úkimet kiris deńgeıi tómen otbasylarmen áleýmettik kelisimshart jasasýda
ASTANA. QazAqparat - Áleýmettik kelisimshart jasasqan azamattarǵa shartty aqshalaı kómek kórsetiledi. Bul týraly búgin Ortalyq kommýnıkatsııalar qyzmetinde ótken brıfıngte Eńbek jáne xalyqty áleýmettik qorǵaý vıtse-mınıstri Svetlana Jaqypova málim etti, dep xabarlaıdy QazAqparat.
Brıfıng barysynda vıtse-mınıstr, az qamtylǵan azamattardy áleýmettik qoldaý men ómir súrý sapasyn jaqsartý baǵytyndaǵy is-qımyldarǵa toqtaldy.
«Áleýmettik álsiz halyq toptaryna qamqorlyq - memleket qolǵa alǵan áleýmettik saıasattaǵy basty basymdyqtar qatarynda qala beredi. Bul maqsatta QR EHÁQM az qamtylǵan azamattardy áleýmettik qoldaý júıesin jańǵyrtý jáne eń tómengi kúnkóris deńgeıin qaıta qarastyrý máseleleri jóninde tıisti jumys júrgizip keledi», - dep atap ótti Svetlana Jaqypova.
2015 jyldyń 29 qazanynda Memleket basshysy qol qoıǵan QR «Qazaqstan Respýblıkasynyń keıbir zań aktilerine halyqty áleýmettik qorǵaý máseleleri boıynsha ózgerister men tolyqtyrýlar engizý týraly»» Zańynda 2018 jyldyń 1 qańtarynan bastap, jumysqa jaramdy otbasy músheleriniń mindetti túrde jumyspen qamtý sharalaryna belsendi qatysý talabymen, árbir múshesine sanaǵanda tabysy eń tómengi kúnkóris deńgeıiniń 50 protsentinen tómen otbasyǵa, ataýly áleýmettik kómekti (AÁK) kórsetýdiń jańa tártibin engizý qarastyrylǵan.
S. Jaqypovanyń aıtýynsha, quramynda eńbekke jaramdy kem degende bir múshesi bar otbasyǵa áleýmettik kelisimshart jasasqan jaǵdaıda, sonymen qatar, otbasynyń barlyq eńbekke jaramdy músheleri jumyspen qamtý sharalaryna mindetti túrde qatysqan jaǵdaıda shartty aqshalaı kómek beriledi.
Áleýmettik kelisimshartqa qol qoıǵan taraptar ózara jaýapkershilikti moıyndaryna alady: áleýmettik qyzmetter jumyspen qamtý sharalaryn qarastyryp, járdemaqy tólese, otbasynyń eńbekke jaramdy músheleri taýyp bergen jumysqa ornalasýy tıis.
"Adamǵa tek aqshalaı kómek usynylmaıdy, oǵan jumysqa ornalasýǵa kómek beriledi, qaıta daıarlaý men kásibı biliktiligin arttyrý úshin ártúrli kýrstarǵa jiberiledi. Osylaısha, otbasynyń kedeılik jaǵdaıynan shyǵý múmkindigi yntalandyrylady.Bul rette balalardy áleýmettik qoldaý kúshin joımaıdy, ıaǵnı AÁK, otbasynyń eńbekke qabiletti músheleriniń jumyspen qamtý sharalaryna qatysý-qatyspaý jaǵdaıyna qaramastan tólene beretin bolady», - dep atap ótti Svetlana Jaqypova.
Áleýmettik kelisimshart jasaǵan tulǵalarǵa shartty aqshalaı kómek kórsetýdi qarastyratyn «Órleý» jobasyn júzege asyrý, 2014 jyldan beri Aqmola, Shyǵys Qazaqstan jáne Jambyl oblystarynda bastaý aldy. 2015 jylǵy 1 shildeden bastap uqsas óńirlik pılottyq jobalar jergilikti bıýdjet qarajaty esebinen qosymsha 38 aýdan men qalada júrgizile bastady. Máselen, 2015 jyly «Órleý» jobasyna 20,2 myń adam, 2016 jyly 38,8 myń adam qatysty.
2017 jyldyń 1 sáýirindegi derek boıynsha «Órleý» jobasyna 48,3 myń adam qatysyp, jumyspen qamtýǵa járdemdesý sharalarymen 9 myń adam nemese jobanyń eńbekke qabiletti qatysýshylarynyń jalpy sanynan 87%-y qamtyldy.
Jobany iske asyrý nátıjesinde oǵan qatysýshylardyń jan basyna shaqqandaǵy ortasha kirisi 2 eseden astamǵa ósip, eńbekke qabiletti qatysýshylarynyń 90%-y jumyspen qamtýǵa járdemdesý sharalaryna tartyldy jáne de pılottyq óńirlerdegi ataýly áleýmettik kómekti alýshylar qatary qysqardy.
Jobany ári qaraı, ıaǵnı 2017 jyly júzege asyrý aýqymynda, respýblıkalyq bıýdjetten 7,1 mlrd teńge qarastyrylǵan. Bıyl «Órleý» pılottyq jobasyna eldiń barlyq aýdany men qalasynan 150 myńǵa jýyq az qamtylǵan azamatty tartý josparlanýda.
