Úkimet keıbir zańnamalyq aktilerge jobalyq qarjylandyrý máseleleri boıynsha túzetýler engizý týraly zań jobasyn maquldady
ASTANA. 28 jeltoqsan. QazAqparat /Marlan Jıembaı/ - Búgin selektorlyq formatta ótken Úkimet otyrysynda Mınıstrler kabınetiniń músheleri «Qazaqstan Respýblıkasynyń keıbir zańnamalyq aktilerine jobalyq qarjylandyrý máseleleri boıynsha ózgertýler men tolyqtyrýlar engizý týraly» QR Zańynyń jobasyn maquldady.
Zań jobasyn QR Ekonomıkalyq damý jáne saýda mınıstri Janar Aıtjanova tanystyrdy.
Memleket basshysynyń aǵymdaǵy jylǵy Qazaqstan halqyna Joldaýynda erekshe zańdy mártebesi bar arnaıy jobalyq uıymdy qura otyryp, jobalyq qarjylandyrý ustanymdaryn engizý qajettiligi aıtylǵandyǵyn eskerip ótken mınıstr: «Qazirgi kezde iri ınfraqurylymdyq jobalar bıýdjetten nemese ulttyq kompanııalardyń qarajattary esebinen qarjylandyrylady. Jobalarǵa jeke ınvestıtsııa tartý qıynǵa túsýde», - dedi.
Onyń atap ótýinshe, iri jobalardy iske asyrýǵa jeke kapıtaldy tartý maqsatynda halyqaralyq konsýltanttarmen yntymaqtasa otyryp, ári jetekshi álemdik tájirıbeni eskerip, elimizde jobalyq qarjylandyrý tetikterin engizý jónindegi atalǵan zań jobasy ázirlengen.
