Úkimet Keden odaǵyna qatysty túsindirý jumystaryn tereń júrgizýi tıis - T. Muhamedjanov
aýsymnyń 10-y. QazAqparat /Qanat Mámetqazyuly/ - Úkimet jurtshylyq arasynda Keden odaǵyna qatysty túsindirý jumystaryn tereń júrgizýi tıis. Búgin QR Parlamenti Senatynyń jalpy otyrysynda Keden odaǵyna qatysty zań jobalar toptamasyn talqylaý barysynda senator Tólegen Muhamedjanov osylaı málim etti.
«Búgingi qoǵamda oryn alyp otyrǵan máselelerge kóz juma qaraýǵa bolmaıdy. Óıtkeni, qazirgi tańda bir top azamattar halyqqa, bılik basyndaǵylarǵa Keden odaǵynyń el táýelsizdigi men egemendigine qaýip tóndiretinin aıtyp, úndeý tastap otyr. Jalpy, biz ótken joly da Keden odaǵyna enýge qatysty jurtqa túsindirý jumystarynyń baǵdarlamasyn jasaý qajettigin eske salǵan bolatynbyz. Osy turǵydan alǵanda bundaı baǵdarlama bar ma, bolsa ol búgingi máselelerge jaýap bere ala ma degen oryndy saýal týady. Óıtkeni, Keden odaǵyna qatysty úndeýge qol qoıǵandardyń basym kópshiligi elimizdegi qazaq tildi gazetterdiń bas redaktorlary bolyp otyr», dedi senator Tólegen Muhamedjanov. Onyń aıtýynsha, Úkimet Keden odaǵynyń enýine baılanysty túsindirý jumystaryn shapshań qolǵa alýy tıis. Al ondaı túsindirý jumystary naqty, túsinikti ári qarapaıym bolýy shart.
Óz kezeginde Qarjy mınıstri Bolat Jámishev Keden odaǵyna kirigýge qatysty óz oıyn ortaǵa saldy. «Jalpy, bizge Keden odaǵyna kirmeý, oǵan qaraı talpynbaý ne beredi? Bizdiń elimiz ondaı odaqtan bas tarta otyryp, óziniń bolashaǵyn qalaı qamtamasyz etpek? Osy turǵydan alǵanda, Keden odaǵyna qarsy shyǵýshylar tarapynan oryndy esh jaýap, uǵynyqty túsinik estı alǵan emespin. Al odaqqa enbeı turyp, bizdiń aldaǵy ekonomıkamyz, onyń básekege qabilettiligi men shıkizatqa baǵdarlanýynan qalaı qutylamyz? Dál osy máselege, ıaǵnı Keden odaǵynynan bas tartyp, basqa joldy tańdaýǵa qatysty baspasózde eshqandaı da tushymdy másele kóterilgen joq», dedi Qarjy mınıstri.
Onyń aıtýynsha, DSU-ǵa Keden odaǵy aıasynda qadam jasaý Qazaqstannyń barlyq áleýetin arttyra túsedi. «Bul Qazaqstannyń kelissózder úderisi boıynsha da ustanymyn jaqsartady. Sondyqtan da Keden odaǵy arqyly DSU-ǵa ený joly kóptegen kedergilerdiń joıylýyna septigin tıgizedi», dedi B. Jámishev.
