Úkimet Keden odaǵy aıasynda kúrish sharýashylyǵyn qalpyna keltirýdiń qadamdaryn jasaýy tıis - M. Ábenov
ASTANA. Jeltoqsannyń 23-i. QazAqparat /Qanat Mámetqazyuly/ - Úkimet Keden odaǵy aıasynda kúrish sharýashylyǵyn qalpyna keltirýdiń sharalaryn qazirden jasaýy tıis.
Búgin QR Parlamenti Májilisiniń jalpy otyrysynda Úkimet basshysynyń atyna joldanǵan saýalynda depýtat Murat Ábenov osylaı málim etti, dep habarlaıdy QazAqparat.
«Úkimettiń tikeleı qoldaýy arqasynda elimizdegi kúrishshiler úlken kórsetkishterdi eńserdi. Bıylǵy jınalǵan kúrish 26 paıyzǵa, ıaǵnı 100 myń tonnaǵa artty. Osylaısha, Qazaqstan tuńǵysh ret óz qajettiligin óteıin dep otyr. Degenmen de, bul qýanyshtyń kópke sozylmaıtyn túri bar. Óıtkeni, qazir ishki naryqta kúrish baǵasy kúrt tómendedi. Al kúrish qunynyń quldyrý sebebin saralasaq, qazirgi kúni Qazaqstanda artyq kúrish joq, syrttan ákelinbese de ózimizdiń ónim ózimiz paıdalanýǵa jetedi. Biraq, osydan eki jyl buryn qytaı kúrishi ishki naryqta básekeles bolsa, endi onyń ornyn reseılik sapasy joǵary, baǵasy tómen kúrish basyp otyr. Al odan qorǵaný úshin eń aldymen Qazaqstan Keden odaǵy sheńberindegi máseleni kóterýi tıis», dedi M. Ábenov.
Depýtattyń aıtýynsha, Keden odaǵyna kirgennen keıin syrtqy naryqtan qorǵaıtyn tarıftik tetikter júzege asady. Biraq, ishki naryqta ásirese kúrish salasyna memlekettik qoldaýdy barynsha arttyrǵan Reseı basymdyqta bolady. «Ras, biz Keden odaǵy aıasynda syrtqy qaýipterden qorǵanys úshin tarıfterdi saraladyq, al ishki erejeler qalaı bolmaq? Máselen, búgingi kúni Reseı kúrish ósirýshilerdi myqty qoldap otyr, sondyqtan olar shetelden kúrishtiń enýine jol bermeıdi. Tarıfterdi arttyrý arqyly Qytaı kúrishinen de qorǵanýda. Al Qazaqstanda bundaı sharalar qabyldanbaǵan. Bir sózben aıtqanda, Keden odaǵy aıasynda syrtqy qaýipterge tosqaýyl bolǵanymen de, ishki naryqta reseılik kúrish ósirýshiler basymdyqqa ıe bolyp otyr. Eger bulaı kete berse, qazaqstandyq naryqtyń bárin reseı kúrishteri jaýlap, otandyq kúrishshiler zııan shegedi», dedi M. Ábenov.
Osyǵan oraı, depýtat «QazAgro» arqyly otandyq kúrishter satyp alynsa, osy salaǵa memlekettik qoldaýlar jasalsa degen tilegin bildirdi. «Bul rette Keden odaǵy aıasynda birkelki sharalar júzege asýy tıis. Máselen, jańaǵy kúrish sharýashylyǵyna qatysty sýbsıdııalar, jeńildikter bolsa, barlyq memlekette birdeı bolýy shart. Áıtpese, ekonomıkany damytý qıynǵa soǵady», dedi ol.
