Úkimet Qazaqstanǵa azyq-túlik taýarlaryn ımporttaıtyn naryqta qazaqstandyq kásiporyndardyń úlesin ulǵaıtý jónindegi sharalardy ázirleýde - Ó. Shókeev
ASTANA. Mamyrdyń 11-i. QazAqparat /Ernur Aqanbaı/ - Úkimet Qazaqstanǵa azyq-túlik taýarlaryn ımporttaıtyn naryqta qazaqstandyq kásiporyndardyń úlesin ulǵaıtý jónindegi sharalardy ázirleýde. Bul týraly búgin Úkimet otyrysynda Premer-Mınıstrdiń birinshi orynbasary Ómirzaq Shókeev málim etti,
dep habarlaıdy QazAqparat.
«Azyq-túlik naryǵyndaǵy jaǵdaıǵa toqtalatyn bolsaq, bizde ishki óndiris aıtarlyqtaı ósip keledi. Alaıda, biz ımportty azdap kózden tasa etip alǵan tárizdimiz. Bizge azyq-túlik taýarlary negizinen Qytaıdan jáne Eýropadan ımporttalady. Onymen negizinen sheteldiń azamattary shuǵyldanady. Olardyń sany asa kóp emes. Biraq ta Qytaıdan keletin ımport óte jaqsy uıymdastyrylǵan. Olar qajet bolǵan kezde baǵany kóteredi, al ımport naryǵyna bizdiń kásipkerlerimiz kirgisi kelgende dempıngtep, qysym jasaıdy. Olardyń is-qımyldary óte uıymdastyrylǵan. Sondyqtan Úkimet ákimdermen birlesip júıeli sharalardy ázirlep jatyr. Buǵan Áleýmettik kásipkerlik korporatsııalardy tartý qajet shyǵar. Áleýmettik kásipkerlik korporatsııalar elimizge ımporttalatyn azyq-túlik taýarlarynyń naryǵyna kirýi qajet. Úkimet olarǵa atalmysh naryqtan qandaı da bir oryn alýlaryna kómektesýi tıis», dedi Ó. Shókeev.
Onyń aıtýynsha, Áleýmettik kásipkerlik korporatsııalar arqyly ımporttalatyn taýarlardyń kólemi azyq-túlik naryǵyndaǵy baǵalardyń deńgeıine yqpal ete alatyndaı bolýy tıis. «Qazirgi tańda bizde ishki saýda-sattyq týraly zań daıyndalyp jatyr. Meniń oıymsha, osynyń aıasynda biz ekinshi toqsannyń sońyna deıin barlyq tetikterdi pysyqtaıtyn bolamyz», dedi Ó. Shókeev.
