Úkimet Qazaqstanda týrızmdi damytýdyń jańa Tujyrymdamasyn qaraıdy
ASTANA. QazAqparat -QR Úkimeti otyrysynda Qazaqstanda Týrıstik salany damytýdyń jańa tujyrymdamasy qaralady. Bul týraly búgin týrızm jáne bolashaq energııasyna arnalǵan halyqaralyq konferentsııada QR Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.
Onyń sózine qaraǵanda, Memleket basshysynyń tapsyrmasyna sáıkes, vedomstvo týrıstik salany damytýdyń tujyrymdamasyn jańartty.
«Osy oraıda ishki jáne syrttan keletin týrızmdi damytý qajettilikteri, sondaı-aq tıisti ınfraqurylymdy jáne óńirlik mádenı-týrıstik klasterlerdi qurý eskerildi. Erteń bizdiń Tujyrymdamany Úkimet otyrysyna engizetinimizdi atap ótkenimiz jón»,-dedi Muhamedıuly.
Mınıstrdiń aıtýynsha, Tujyrymdamada 6 klaster aıqyndalyp, onda týrıstik usynystar boıynsha Qazaqstannyń geografııalyq áralýandyǵy men etnomádenı sáıkestik kórsetilgen. Bul rette «Astana - Eýrazııa júregi», «Almaty - Qazaqstannyń erkin mádenı aımaǵy», «Altaı injý-marjany», «Uly Jibek jolynyń jandanýy», «Kaspıı qaqpasy» jáne «Tabıǵat pen kóshpeli mádenıettiń tutastyǵy» baǵyttary qamtylyp otyr.
«Tujyrymdamada Qazaqstan úshin basymdyǵy bar týrızm túrleri qarastyrylǵan. Osy oraıda mádenı-tanymdyq jáne etnografııalyq týrızm, oqıǵalyq týrızm, kempıngtik avtotýrızm, ańshylyq- trofeılik týrızm, sporttyq, sondaı-aq ekotýrızm eskerildi»,-dedi dep túıindedi sózin mınıstr.
