Úkimet Qazaqstanda týrızmdi damytý tujyrymdamasyn maquldady
ASTANA. QazAqparat - Úkimet músheleri Qazaqstannyń týrıstik salasyn damytýdyń 2023 jylǵa deıingi tujyrymdamasyn maquldady, dep habarlaıdy QazAqparat.
Atalǵan qujatty tanystyrý barasynda Mádenıet jáne sport mınıstri Arystanbek Muhamedıuly tujyrymdama halyqaralyq tájirıbeni eskere otyryp jasalǵanyn atap ótti. Osy oraıda júrgizilgen taldaý aıasynda týrıstik qyzmetti memlekettik qoldaýdyń birqatar eń tıimdi sharalary aıqyndaldy.
«Bul úlgilerdiń barlyǵyn elde týrıstik salany damytýmen qatar, memlekettik ınvestıtsııalardy qaıtarý turǵysynda tabysty dep ataýǵa bolady. Qazaqstannyń mádenı saıasaty tujyrymdamasynyń basymdyqtaryn eskere otyryp, sondaı-aq Ult josparynyń 86 qadamyn júzege asyrý aıasynda týrıstik klasterler qaıta qaraldy, olardyń ataýlary ózgertilip, altynshy klaster qosyldy»,-dedi mınıstr.
Atap aıtqanda, Astana klasteri eki mádenı-týrıstik klasterge bólindi: «Astana - Eýrazııa júregi» elordany qamtıtyn bolady.
«Tabıǵat pen kóshpeli mádenıettiń tutastyǵy» klasterine týrıstik qyzyǵýshylyq tanytatyn negizgi oryndar endi.
«Almaty - Qazaqstannyń erkin mádenı aımaǵy» klasterinde «Aqbulaq» halyqaralyq týrıstik ortalyǵy, «Jońǵar-Alataý» memlekettik ulttyq tabıǵı parki, «Kólsaı kólderi» Memlekettik ulttyq tabıǵı parki, «Qara Dala» kýrorttyq aımaǵy eskerildi.
«Uly Jibek jolynyń jandanýy» klasterine Aqsý-Jabaǵyly memlekettik tabıǵı qoryǵy, «Qasqasý» taýly kýrorty qosyldy.
«Kaspıı qaqpasy» klasterinde (Mańǵystaý oblysy men Batys Qazaqstan jáne Atyraý oblystarynyń bir bóligi) ázirlenetin negizgi týrıstik ónimderinde jaǵalaý týrızmi, mádenı týrızm jáne týrne qamtyldy.
«Altaı injý-marjany» klastri (ShQO-nyń soltústik jáne shyǵys bólikteri) «Tabıǵattyń ǵajaıyp álemi» taqyrybynda usynylady jáne ekologııalyq týrızmniń ortalyǵy bolyp tabylady.
Atalǵan Tujyrymdamany eki kezeńde, ıaǵnı 2017-2019 jáne 2020-2023 jyldary júzege asyrý josparlanyp otyr.
Óz kezeginde Úkimet basshysy Baqytjan Saǵyntaev atalǵan qujat jetkilikti deńgeıde pysyqtalǵanyn atap ótti.
«BUU Búkilálemdik týrıstik uıymnyń (ıÝNVTO) bas hatshysynyń Úkimet otyrysyna qatysýy elimizdiń osy salany damytýǵa qanshalyqty kóńil bólip otyrǵanyn baıqatyp otyr. Bul baǵytta birlese jumys isteýimiz kerek. Sondyqtan týrızm salasyndaǵy mindetterdi jalǵyz Mádenıet jáne sport mınıstrligine júkteı salǵan durys bolmaıdy»,-dep túıindedi sózin Premer-Mınıstr.
