Úkimet Qazaqstanda atqarylatyn iri kóliktik-logıstıkalyq jobalardyń merzimderin atady
ASTANA. QazAqparat - 2014 jyldyń 1 shildesinde Aqtaý teńiz portynyń ótkizý qýatyn arttyrý maqsatynda júk kemelerine arnalǵan úsh termınaldyń qurylysy bastalady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Ekonomıka jáne bıýdjettik josparlaý mınıstri Erbolat Dosaev málim etti.
Ol sonymen qatar ózge de aýqymdy kóliktik jobalardyń qurylysyna qatysty máselelerge toqtaldy.
1 shildede «Qorǵas-Shyǵys qapa» arnaıy ekonomıkalyq aımaqta júk portyn salýdy bastaý josparlanýda.
«Bul jobany «QTJ» 36,8 mlrd. teńgege qarjylandyrady. Sonymen qatar respýblıkalyq bıýdjetten 38,4 mlrd. teńge kóleminde qosymsha qarajat bólý kózdelgen», - dedi E.Dosaev. Sondaı-aq onyń aıtýynsha, 2014 jyldyń 1 jeltoqsanynda «Jezqazǵan-Beıneý» temirjol jelileri paıdalanýǵa beriledi.
