Úkimet qaýlysymen ShQO-daǵy áýejaı, kolledj jáne birqatar mekteptiń ataýy ózgerdi

NUR-SULTAN. QazAqparat – Qazaqstan Respýblıkasy Úkimetiniń qaýlysymen Shyǵys Qazaqstan oblysyndaǵy áýejaı, kolledj jáne mektepterge uly adamdardyń aty berilip, birqatarynyń ataýy ózgerdi, dep habarlaıdy QazAqparat primeminister.kz-ke silteme jasap.

«Shyǵys Qazaqstan oblysynyń keıbir obektilerine ataý berý jáne qaıta ataý týraly» Qazaqstan Respýblıkasy Úkimetiniń 2020 jylǵy 23 sáýirdegi №241 qaýlysymen birqatar nysanǵa ataý berildi.

Óskemen qalasyndaǵy Aǵylshyn tilin tereńdetip oqytatyn №38 gımnazııasyna Lev Gýmılevtiń esimi, № 39 orta mektepke Ybyraı Altynsarınniń esimi, Shyǵys Qazaqstan gýmanıtarlyq kolledjine Abaıdyń esimi berildi.

Semeı halyqaralyq áýejaıyna Abaıdyń esimi, Semeıde qalasyndaǵy № 47 mektepke Ahmet Baıtursynulynyń, №37 gımnazııaǵa Ybyraı Altynsarınniń, №39 orta mektepke Álıhan Bókeıhannyń, № 34 mektepke Baýyrjan Momyshulynyń, № 2 mektepke Qanysh Sátbaevtyń esimi berildi.

Shemonaıha aýdanynda № 5 mektepke Ahmet Baıtursynulynyń, № 4 mektepke Shákárimniń esimimen ataldy.

Sonymen qatar, Semeıdegi Prıgorod mektebi Júsipbek Aımaýytov atyndaǵy jalpy orta bilim beretin mektep bolyp, Besqaraǵaı aýdanyndaǵy Berezovka orta mektebi Boztal orta mektebi, Úlken Vladımırovka orta mektebi Qaırat Rysqulbekov atyndaǵy orta mektep bolyp ózgertildi.

Shemonaıha aýdanyndaǵy «Qyzyl Shemonaıha mektebi» Ybyraı Altynsarın atyndaǵy mektep, «Mıhaılovka orta mektebi» Shoqan Ýálıhanov atyndaǵy mektep bolyp ózgerdi.

Sondaı-aq, «Praporşıkovo mektebi» Dinmuhamed Qonaev atyndaǵy mektep, «Perevalovka mektebi» Málik Ǵabdýllın atyndaǵy mektep, «Bobrovka mektebi» Ahmet Baıtursynuly atyndaǵy mektep, «Ýshanov orta mektebi» Baýyrjan Momyshuly atyndaǵy, № 2 Aqsýat orta mektebi Qojageldi batyr atyndaǵy mektep bolyp qaıta ataldy.

Aıta keterligi, QR Premer-Mınıstri Asqar Mamın qol qoıǵan qaýly resmı jarııalanǵan kúninen bastap qoldanysqa engizildi.