Úkimet Kaspıı sý tushytý zaýytyn keńeıtýge qosymsha 5,6 mlrd teńge bóldi
«Jaqynda men Mańǵystaý oblysynda boldym. Ózderińiz biletindeı, óńirde turǵyndardy sýmen qamtamasyz etý problemasy bar. Búgingi tańda Úkimet Kaspıı sý tushytý zaýytyn keńeıtýge 5,6 mlrd teńge qosymsha qarjy bólý sheshimin qabyldady. Bul oblystyń 3 aýdandaǵy 180 myń adamdy aýyz sýmen qamtamasyz etýge múmkindik beredi», - dedi Premer-Mınıstr.
Osy rette Úkimet basshysy óńir ákimi Nurlan Noǵaevtan zaýytty keńeıtý jumystary qalaı júrgizilip jatqanyn surady.
Mańǵystaý oblysy ákiminiń aıtýynsha, mamyrdan qyrkúıek aıynyń sońyna deıin óńirde sý jetispeýshiligi baıqalady.
«Prezıdenttiń tapsyrmasyna sáıkes jáne sizdiń qoldaýyńyzben biraz joba júzege asyrylyp jatyr. Jaqyn arada, 2-3 kúnde Munaıly aýdanynda sýmen qamtýda keleńsizdiń oryn aldy. Ol tehnologııalyq sorǵynyń isten shyǵýyna baılanysty boldy. Zaýyttyń basshylyǵy jáne áriptesterimizdiń der kezinde qabyldanǵan shuǵyl sharalarynyń nátıjesinde aqaý joıylyp, qazir Munaıly aýdanyna qajetti deńgeıde sý berilip otyr», - dedi ol.
Onyń atap ótýinshe, Kaspıı sý tushytý zaýytynda táýligine 20 tekshe metr sý daıyndaıtyn qondyrǵy jumys istep tur. Onyń 40 myń tekshe metrge arttyrý boıynsha joba júzege asyrylýda.
«Qazirgi tańda qurylys-montajdaý jumysy 80 paıyzǵa jýyq aıaqtaldy. Negizgi tehnologııalyq jabdyqtardy, qurylǵylardy ornatý jónindegi tapsyrys berildi. Búginde olar daıyndalyp jatyr. Tamyz aıynda sol qondyrǵylar Mańǵystaýǵa kele bastaıdy. Sodan bastap montajdaý jumysymen aınalysamyz. Qyrkúıek aıynyń sońyna deıin montajdaý jumystaryn aıaqtap, qazanda iske qosýdy josparlap otyrmyz. Siz atap ótken 5,6 mlrd teńge bizge qomaqty kómek»,- degen Nurlan Noǵaev mańǵystaýlyqtardyń atynan Úkimetke rızashylyǵyn bildirdi.
