Úkimet kásipkerlik qyzmetti jaqsartatyn zań jobasy boıynsha depýtattarmen syndarly dıalogqa daıyn - B. Saǵyntaev
ASTANA. QazAqparat - Úkimet kásipkerlik qyzmetti jaqsartýǵa baǵyttalǵan zań jobasy boıynsha depýtattarmen syndarly dıalogqa daıyn.
Búgin Májiliste «Qazaqstan Respýblıkasynyń keıbir zańnamalyq aktilerine kásipkerlik qyzmetti túbegeıli jaqsartý máseleleri boıynsha ózgerister men tolyqtyrýlar engizý týraly» zań jobasy boıynsha QR Premer-Mınıstrdiń birinshi orynbasary Baqytjan Saǵyntaev osylaı málimdedi. Eske sala keteıik, Májiliste atalǵan zań jobasy boıynsha jumys keńesi ótip, oǵan Májilis Tóraǵasynyń orynbasary, «Nur Otan» partııasy fraktsııasynyń jetekshisi Darıǵa Nazarbaeva, palatanyń komıtet tóraǵalary, QR Premer-Mınıstriniń birinshi orynbasary Baqytjan Saǵyntaev qatysty.
Toqtala ketetin jaıt, qujat buǵan deıin Májiliste birinshi oqylymda tujyrymdamalyq túrde maquldanǵan bolatyn. Vıtse-spıker Darıǵa Nazarbaevanyń sózine qaraǵanda, qazir zań jobasy óte belsendi talqylaný ústinde. Sonymen qatar, Elbasy tapsyrmasyna sáıkes, qujat aǵymdaǵy jyldyń sońyna deıin qabyldanyp, kelesi 2015 jyldyń 1 qańtarynan bastap kúshine enýi kerek. «Ýaqyt tym az. Qazirdiń ózinde depýtattardan 1293 usynys kelip tústi, olardyń 766-sy qabyldansa, 115-i qabyldanǵan joq, al qalǵan 412 usynys áli talqylanyp jatyr. Zań jobasy ekinshi oqylymda 10 jeltoqsan kúni qaralady dep josparlanǵan. Osyǵan oraı, Úkimet basshysynyń birinshi orynbasaryn shaqyryp, túıtkildi máselelerge túsinik berýdi suraǵanbyz», - dedi D. Nazarbaeva.
Óz kezeginde B. Saǵyntaev zań jobasynyń tym kúrdeli ekenin aıta kele, bul baǵytta depýtattarmen syndardy dıalogqa daıyn ekenin alǵa tartty. «Maǵan áriptesterim zań jobasynyń komıtetterde qalaı talqylanyp jatqany týraly kún saıyn baıandap otyrady. Osy baǵytta depýtattarmen birlese jumys istep, barlyq suraqtarǵa jaýap berýge, qujatty ilgeriletý úshin máselelerdi jan-jaqty qarastyrýǵa daıynbyz. Men vıtse-premer retinde jaýapkershilikti óz moınyma alamyn: zań jobasynyń alǵa qaraı ótýine kedergi máseleniń barlyǵy alynyp tastalady», - dedi B. Saǵyntaev.
Eske sala keteıik, zań jobasy Elbasynyń Parlamenttiń tórtinshi sessııasynyń ashylýy barysynda bergen tapsyrmalaryn oryndaý maqsatynda ázirlengen. Bul rette qujat memlekettik baqylaýdy jetildirý, kásipkerlik sýbektilerin josparly tekserýdi joıý jáne jańa tásildi anyqtaý esebinen táýekelderdi baǵalaý negizindegi tekserýlerdi uıymdastyrýǵa kóshýdi qarastyrady.
