Úkimet qaraýyna «Doing Business» reıtıngi ındıkatorlaryn jaqsartýdyń 2014 jylǵa arnalǵan Keshendi jospary usynyldy
ASTANA. QazAqparat - «Doing Business» reıtıngi ındıkatorlaryn jaqsartý jónindegi sharalar aıasynda birqatar zańnamalyq aktilerge ózgerister engizilmek.
«Dúnıejúzilik banktiń «Doing Business» reıtıngi ındıkatorlaryn jaqsartý jónindegi sharalardyń 2014 jylǵa arnalǵan Keshendi josparyn usynyp otyrmyz. Osy reıtıng aıasyndaǵy jumystyń negizgi maqsaty - ındıkatorlardyń ustanymdaryn tek qana jaqsartý emes, sonymen qatar atalǵan reıtıngti bıznesti júrgizý úshin qoldanystaǵy ákimshilik kedergilerdi anyqtaý men taldaý jáne olardy joıý jóninde qajetti sharalardy qabyldaý úshin tetik retinde paıdalaný», - dedi búgin Úkimet otyrysynda QR Óńirlik damý mınıstri Bolat Jámishev.
Onyń aıtýynsha, 19 normatıvtik quqyqtyq akti boıynsha tizim qalyptastyrylyp, onyń aıasynda bes kodekske, úsh zańǵa, on bir zańǵa qosymsha aktilerge ózgerister eskerilgen.
Osy ózgerister qabyldanǵan jaǵdaıda ekologııalyq, sanıtarlyq-epıdemıologııalyq, energetıkalyq, óndiristik qaýipsizdik salasynda keıbir protsedýralardy jeńildetýge múmkindik týady.
«Reıtıngte 189 memlekettiń arasynda 50 orynda turǵan joǵary pozıtsııaǵa qaramastan, «Halyqaralyq saýda», «Qurylysqa ruqsat berý», «Energııamen qamtamasyz etý júıesine qosylý», «Nesıe alý» ındıkatorlary turǵysynda kórsetkishter tómen»,-dedi B. Jámishev.
Osy oraıda Óńirlik damý mınıstri atalǵan Keshendi jospardy júzege asyrý úshin qajetti zańnamalyq aktilerge barlyq ózgerister qazirgi kezde daıyn turǵanyn atap ótti.
