Úkimet ındýstrııalandyrý baǵdarlamasynyń ekinshi besjyldyǵyn maquldady

ASTANA. QazAqparat - Qazaqstan Úkimeti ındýstrııalandyrý baǵdarlamasynyń ekinshi besjyldyǵyn maquldady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Premer-Mınıstrdiń orynbasary - Indýstrııa jáne jańa tehnologııalar mınıstri Áset Isekeshev málim etti.

«Búgin Úkimet ındýstrııalyq-ınnovatsııalyq damý memlekettik baǵdarlamasyn maquldady. Memleket basshysy ony bekitkennen keıin Úkimet sharalardyń tyńǵylyqty josparyn qabyldaıtyn bolady», dedi ol.

Onyń atap ótýinshe, ekinshi besjyldyq tórt baǵyt boıynsha damytylatyn bolady.

Birinshisi, makroekonomıkalyq turaqtylyqty jáne qarjylyq bazanyń ósimin qamtamasyz etýi tıisti shıkizattyq sektor. Ekinshisi, ósim sapasyn qamtamasyz etetin óńdeý ónerkásibi. Úshinshisi, bolashaqta básekelestikti qamtamasyz etetin ınnovatsııalyq sektor. Tórtinshisi, adamdardy jumyspen qamtıtyn sektor.

«Osy besjyldyqta bıznestiń barynsha belsendi qatysýyn atap ótýge bolady. Atap aıtqanda, Ulttyq kásipkerler palatasy baǵdarlamany ázirleýge de, ony júzege asyrýǵa da atsalysatyn bolady», - dedi Á.Isekeshev.