Úkimet inDriver men ıAndeks taksı qyzmetin retteıtin zań jobasyn ázirlep jatyr
ASTANA. QazAqparat - Búgin elordada halyq aldyndaǵy eseptik kezdesýde Investıtsııalar jáne damý mınıstri Jeńis Qasymbek inDriver men ıAndeks taksıge qatysty júıelerdiń jumystary normatıvtik-quqyqtyq aktilermen qashannan bastap retteletin málim etti, dep habarlaıdy QazAqparat tilshisi.
Eseptik kezdesý barysynda mınıstrge «inDriver, ıAndeks Taksı jáne basqa da mobıldik júktemelerge qoıylatyn talaptardy qatańdatý zańnama deńgeıinde qarastyryla ma?» degen saýal boldy.
«Rasynda búginde Qazaqstanda ıAndeks Taksı, Aparu, inDriver jáne ózge de mobıldik qosymshalar jumys istep jatyr. Olar óte tıimdi ári paıdaly bolyp otyr. Atalǵan qyzmetterdiń baǵalary da basqa taksı túrlerine qaraǵanda qolaıly. Biraq normatıvtik-quqyqtyq aktilermen olardyń jumystary tolyǵymen rettelmegen. Sondyqtan qazirgi kezde zańdarǵa tıisti ózgeristerdi engizip jatyrmyz», - dedi Jeńis Qasymbek.
Osy oraıda ol bul baǵyttaǵy qujat Úkimettiń qaraýynda ekenin atap ótti.
«Aǵymdaǵy aıdyń sońyna deıin Úkimetten Parlament Májilisine engiziledi dep josparlap otyrmyz. Bıyldyń aıaǵyna deıin bul zań qabyldansa, onda tolyǵymen osy júıelerdiń jumystary normatıvtik-quqyqtyq aktilermen retteletin bolady», - dedi mınıstr.
