Úkimet halyqtyń biliktiligin arttyrýǵa baǵyttalǵan memlekettik baǵdarlamany ázirleýde - K.Másimov
ASTANA. 18 qarasha. QazAqparat /Gúlmıra Álıakparova/ - Qazaqstan azamattary Úkimet júzege asyryp otyrǵan barlyq aýqymdy baǵdarlamalarǵa qatysýy úshin ózderiniń kásibıligi men biliktilikterin arttyrýy kerek.
Bul týraly búgin Astanada ótken «Ekspert-100-Qazaqstan» ekinshi Ekonomıkalyq forýmda Premer-Mınıstr Kárim Másimov málim etti.
«Biz aıtyp otyrǵan barlyq aýqymdy baǵdarlamalarǵa, sonyń ishinde ındýstrııalandyrý, aýyl sharýashylyǵy baǵdarlamalaryna Qazaqstan azamattary qatysa alýy úshin, olarǵa biliktilikterin arttyrýǵa múmkindik jasaýymyz qajet», dedi Úkimet basshysy.
«Elde bir ispen ǵana aınalysatyn, biliktilikteri asa joǵary emes halyq sanaty bar. Olar elde júzege asyrylyp jatqan úrdisterdiń jemisin ózderinde seze almaı qalýy múmkin», - dedi K.Másimov.
Úkimet basshysynyń sózine qaraǵanda, qazir halyqtyń biliktiligin arttyrýdy maqsat tutatyn memlekettik baǵdarlama ázirlený ústinde. Ol Elbasynyń tarapynan qoldaý tapqannan keıin jarııalanatyn bolady.
