Úkimet halyqty jumyspen qamtý salasyna tyń serpin beretin sharalardy oılastyrýy kerek - sarapshy pikiri
«Qazirgi tańda búkil álemdi jaılaǵan pandemııadan týyndaǵan daǵdarys álemniń kóptegen elderiniń áleýmettik-ekonomıkalyq jaǵdaıyndaǵy kemshin tustardy kórsetti. Bul daǵdarystyń elimizdi de aınalyp ótpegeni barlyǵymyzǵa belgili. Álemniń kóptegen eli strategııalyq joldaryn qaıta qarastyrý máselesin de talqylap jatyr. Búgingi Úkimettiń keńeıtilgen otyrysynda Prezıdentimiz Qasym-Jomart Toqaevtyń da pikiri osyǵan kelip saıady. Árıne, jyl basynan beri jáne oǵan deıin de atqarylǵan, jaqsy nátıje bergen sharalar kóp. Biraq, dál qazir el ekonomıkasy úlken synı kezeńmen betpe-bet kelgenin kórip otyrmyz», - dedi Baqytgúl Qambar.
Sarapshy oǵan dálel retinde osy jyldyń basynan elimizdiń ekonomıkalyq ósiminiń 1,8 paıyzǵa tómendeýin alǵa tartady.
«Munan bólek, ekonomıkalyq turǵyda belsendi halyqtyń jartysynan kóbin jumyspen qamtyp otyrǵan qyzmet kórsetý salasy ósiminiń de jyl basynan beri 5,6 paıyzǵa tómendeýi jumyssyzdyqtyń ary qaraı arta túsý qaýpi bar ekenin kórsetedi. Al bul jaıttyń el bıýdjetine yqpal etetin keri saldary aıtpasa da túsinikti jaıt. Sondyqtan Úkimet halyqty jumyspen qamtý salasynda jańa serpin beretin sharalar oılastyrý kerek dep oılaımyn», - dedi ortalyq basshysy.
Baqytgúl Qambar búgin Memleket basshysyÚkimetke bul baǵytta shuǵyl sharalar qabyldaý kerektigin tapsyrǵanyn jáne aldaǵy ýaqytta jańa Joldaýy jarııalaıtyndyǵyn eskertkenin atap ótedi.
«Jańa Joldaýda ekonomıkamyzǵa tyń, jańa serpin beretin naqty bastamalar bolady dep oılaımyn. Bul oraıda aldaǵy ýaqytta qolǵa alynatyn sharalarǵa der kezinde monıtorıng jasap, ár kezeńinde naqty baǵa berý júıesin jetildirýdiń de mańyzy zor bolmaq», - dedi sarapshy.
