Úkimet halyqty eńbekpen qamtýdyń jańa baǵdarlamasymen tanysty
ANA. 5 aqpan. QazAqparat /Marlan Jıembaı/ - Búgin Úkimet otyrysynda QR Eńbek jáne halyqty áleýmettik qorǵaý mınıstri Gúlshara Ábdihalyqova 2020 jylǵa deıin arnalǵan halyqty eńbekpen qamtý jańa baǵdarlamasynyń jobasyn Mınıstrler Kabıneti músheleriniń nazaryna usyndy.
Mınıstrdiń atap ótýinshe, baǵdarlama úsh baǵyt boıynsha júzege asyrylatyn bolady. Onyń birinshisi - oqytý arqyly belsendirý ári odan ary jumysqa ornalastyrý jáne áleýmettik qoldaý kórsetý. Ekinshisi - ekonomıkalyq ósim núktesine qonys aýdarýdy uıymdastyrý arqyly eńbek resýrstarynyń jedeldigin arttyrý. Úshinshisi - aýyldyq jerde kásipkerlikti damytý.
«Baǵdarlama 2011 jyly úlgi joba retinde qarastyrylady. Al 2012 jyldan bastap tolyqqandy júzege asyrý boljanýda», - dedi mınıstr.
2015 jylǵa qaraı atalǵan baǵdarlamanyń 1,5 mıllıonǵa jýyq adamdy qamtıtyndyǵyn atap ótken ol: «Ony júzege asyrý respýblıkadaǵy kedeıshilik deńgeıin 6 paıyzǵa deıin tómendetýge sonymen qatar, árıne jumyssyzdyq deńgeıiniń 5,5 paıyzdan asyp ketpeýine múmkindik beredi», - dedi g.Ábdiqalyqova.
