Úkimet halyq pen ekonomıkany qoldaýǵa qosymsha 575 mlrd teńge jumsaıdy

NUR-SULTAN. QazAqparat - 575 mlrd teńge qosymsha shyǵystar azamattar men ekonomıkany qoldaýǵa jumsalady. Bul týraly QR Premer-mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Respýblıkalyq bıýdjettiń salyq kiristeriniń tómendeýin óteýge jáne tıisti memlekettiń barlyq áleýmettik mindettemelerin oryndaýǵa 1,7 trln teńge bólinedi. Ekonomıkanyń zardap shekken sektorlaryndaǵy shaǵyn jáne orta bıznes sýbektileri men iri bıznes ókilderiniń eńbek aqy tóleý boıynsha salyqtar men alymdardy tóleýden bosatylýyna baılanysty jergilikti bıýdjetterdiń shyǵyndaryn óteýge 237 mlrd teńge qarastyrylǵan», - dedi ol.

Onyń atap ótýinshe, 313 mlrd teńge áleýmettik tólemderdiń, ıaǵnı, zeınetaqylar, járdemaqylar, ataýly áleýmettik kómek 10 paıyzǵa deıin qosymsha ındeksteýge, stıpendııany deńgeıin arttyrýǵa jáne turǵyndardyń kommýnaldyq qyzmetteriniń aqysyn tóleýge jumsalady. Agroónerkásiptik keshendi damytý, «Eńbek», «Bıznestiń jol kartasy – 2025», «Aýyl – el besigi» baǵdarlamalardy keńeıtýge 240 mlrd teńge baǵyttalady.

«Epıdemııaǵa qarsy is-sharalardy júrgizýge 125 mlrd teńge, onyń ishinde medıtsınalyq jáne basqa qyzmetkerlerge qosymsha aqy tóleý, halyqtyń az qamtylǵan topttaryna azyq-túlik-turmystyq jıyntyqtarmen qamtamasyz etý qarastyrylǵan. 575 mlrd teńge qosymsha shyǵystar azamattar men ekonomıkany qoldaýǵa, onyń ishinde Memleket basshysynyń tapsyrmalaryn iske asyrýǵa baǵyttalady. Osy qarajattar aıasynda Nur-Sultan qalasyndaǵy úlestik qurylystyń problemalyq nysandaryn aıaqtaýǵa arnalǵan shyǵystar, aıyrbas baǵamynyń ózgerýine baılanysty shyǵystar jáne basqa da shyǵystar kózdelgen», - dedi Álıhan Smaıylov.